കെന്നിങ്ടണ്‍: ഓവലില്‍ ഇന്ന് ആസ്‌ത്രേലിയയെ നേരിടാനിറങ്ങുന്ന ലങ്കയ്ക്ക് ആശ്വസിക്കാന്‍ ഒന്നുമില്ല. ആദ്യ മത്സരത്തില്‍ തന്നെ ന്യൂസിലന്‍ഡിനോട് ദയനീയമായി തോറ്റു. രണ്ടാമത്തെ മത്സരത്തില്‍ അഫ്ഗാനോട് ജയിച്ചെങ്കിലും ആധികാരികമായിരുന്നില്ല വിജയം. മൂന്ന് നാല് മത്സരങ്ങള്‍ ഒരു പന്തു പോലും എറിയാന്‍ അനുവദിക്കാതെ മഴ കളിമുടക്കി.
ഇതോടെ നാലു മത്സരങ്ങളില്‍നിന്ന് വെറും നാലു പോയിന്റ് മാത്രമാണ് ലങ്കയുടെ സമ്പാദ്യം. ഇനിയുള്ള മത്സരങ്ങള്‍ മുന്‍ ലോകചാംപ്യന്‍മാര്‍ക്ക് നിര്‍ണായകമാണ്. ആസ്‌ത്രേലിയ പോലെയുള്ള ടീമിനോട് ഏറ്റുമുട്ടുമ്പോള്‍ ഇതുവരെ സംഭരിച്ച ആയുധങ്ങളൊന്നും മതിയാവില്ല ലങ്കയ്ക്ക്. സ്ഥിരതയാര്‍ന്ന മികവുറ്റ കളിക്കാരുടെ അഭാവം തന്നെയാണ് ശ്രീലങ്കന്‍ ടീമിന്റെ പ്രധാന വെല്ലുവിളി. ബൗളിങ്ങില്‍ മലിംഗയില്‍ തന്നെയാണ് ഏറിയപ്രതീക്ഷയും. അഫ്ഗാനെതിരേയുള്ള മത്സരത്തില്‍ നാലു വിക്കറ്റ് നേടിയ പേസര്‍ നുവാന്‍ പ്രദീപും പ്രതീക്ഷ നല്‍കുന്ന മറ്റൊരു താരമാണ്.എന്നാല്‍ ബാറ്റിങ്ങിലാണ് ലങ്കയുടെ തലവേദന.
അനുഭവ സമ്പത്തുമായി തിസേര പെരേരയും എയ്ഞ്ചലോ മാത്യൂസുമെല്ലാം ഉണ്ടെങ്കിലും ഫോമില്ലായ്മ തിരിച്ചടിയാകുന്നു. ക്യാപ്റ്റന്‍ ദിമുത് കരുണാരത്‌നയും കുശാല്‍ പെരേരയും ഭേദപ്പെട്ട പ്രകടനം കാഴ്ചവയ്ക്കുന്നുണ്ടെങ്കിലും അന്‍പതോവര്‍ മുഴുവന്‍ പിടിച്ചുനില്‍ക്കാനുള്ള കരുത്ത് ഇന്നത്തെ ശ്രീലങ്കന്‍ ടീമിനില്ല. മറുഭാഗത്ത് ഇന്ത്യയോട് തോറ്റതൊഴിച്ചാല്‍ ഫുള്‍ ചാര്‍ജിലാണ് ആസ്‌ത്രേലിയന്‍ടീം. മറ്റൊരു മത്സരത്തില്‍ ദക്ഷിണാഫ്രിക്ക അഫ്ഗാനിസ്ഥാനെ നേരിടും.