മേഘാലയ

കോണ്‍ഗ്രസ്
പരാജയപ്പെടുമെന്ന് പ്രതിപക്ഷം

ഷില്ലോങ്: അടുത്ത വര്‍ഷം നടക്കുന്ന സംസ്ഥാന തെരഞ്ഞെടുപ്പില്‍ കോണ്‍ഗ്രസ് പരാജയപ്പെടുമെന്ന് ബി.ജെ.പി ഉള്‍പ്പെടെയുളള പ്രതിപക്ഷ പാര്‍ട്ടികള്‍. ജനവിരുദ്ധ നടപടികളാണ് കോണ്‍ഗ്രസിനെ ഭരണത്തില്‍ നിന്ന് അകറ്റുകയെന്നും അവര്‍ അവകാശപ്പെടുന്നു. സംസ്ഥാനത്ത് ഭരണ വിരുദ്ധ വികാരം ഉണ്ടെന്ന കാര്യത്തില്‍ സംശയമില്ലെന്ന് മുതിര്‍ന്ന കോണ്‍ഗ്രസ് നേതാവും മന്ത്രിയുമായ സെനിത്ത് സാങ്മ സമ്മതിക്കുന്നുണ്ട്. ഇത്തരത്തിലുള്ള നിലപാട് മാറ്റിയെടുക്കാന്‍ കഴിയുന്നതാണെന്ന് മന്ത്രി വ്യക്തമാക്കി.

മധ്യപ്രദേശ്

ഗ്രാമീണരുടെ വൈദ്യുതി കുടിശ്ശിക ഒരു കോടി രൂപ

ഭോപ്പാല്‍: സാഗര്‍ ജില്ലയിലെ നൂറ് ഗ്രാമങ്ങളിലെ ഗ്രാമീണരുടെ വൈദ്യുതി ബില്‍തുക ഒരു കോടിയിലധികമായി. തങ്ങള്‍ക്ക് കിട്ടുന്ന ബില്ലിലെ തുക ഇവര്‍ അടക്കാതായതോടെയാണ് തുക ഒരു കോടിയോളമായി ഉയര്‍ന്നത്. ഈ ജില്ലയില ആറ് ഗ്രാമങ്ങളില്‍ ബില്‍തുക അടക്കാതായതോടെ വൈദ്യുതി ബന്ധം വിച്ഛദിച്ചിരുന്നു. ഇതേ രീതിയിലുള്ള നടപടികളാണ് നൂറ് ഗ്രാമങ്ങളിലേക്കും വരാന്‍ പോകുന്നതെന്ന് വൈദ്യുതി വകുപ്പ് പറയുന്നു.

ഒഡിഷ

ചോരക്കുഞ്ഞിന്റെ മൃതദേഹം
തെരുവുനായ്ക്കള്‍ ഭക്ഷിച്ചു

ഭുവനേശ്വര്‍: ഒഡിഷയിലെ കൊരാപുട്ട് ജില്ലയിലെ ജെയ്പൂര്‍  സബ് ഡിവിഷനല്‍ ആശുപത്രിയില്‍ ചോരക്കുഞ്ഞിന്റെ മൃതദേഹം തെരുവുനായ്ക്കള്‍ ഭക്ഷിച്ചു.  കുഞ്ഞിന്റെ മൃതദേഹം തെരുവുനായ്ക്കള്‍ ഭക്ഷിക്കുന്നതും നോക്കി നിരവധി പേരും സ്ഥലത്തുണ്ടായിരുന്നു. സംഭവം കണ്ടിട്ടും ആര്‍ക്കും ഒരു തരത്തിലുള്ള മനപ്രയാസവും ഉണ്ടായില്ലെന്ന് മാത്രമല്ല, ചിലര്‍ ഇത് മൊബൈല്‍ ഫോണില്‍ പകര്‍ത്താന്‍ മത്സരിക്കുകയായിരുന്നുവെന്ന് പൊലിസ് പറഞ്ഞു.
വിവരമറിഞ്ഞ് സ്ഥലത്തെത്തുമ്പോള്‍ മൃതദേഹത്തിന്റെ അവശിഷ്ടം കണ്ടെടുക്കാന്‍ പോലുമില്ലായിരുന്നുവെന്ന് സബ്ഡിവിഷനല്‍ ആശുപത്രി മെഡിക്കല്‍ ഓഫിസര്‍ സിതാന്‍ഷു സതാപതി പറഞ്ഞു. സംഭവത്തെക്കുറിച്ച് അന്വേഷണത്തിന് ഉത്തരവിട്ടിട്ടുണ്ട്.

ഛത്തിസ്ഗഡ്

15 മാവോവാദികള്‍ കൊല്ലപ്പെട്ടു

റായ്പൂര്‍: സി.ആര്‍.പി.എഫ് ജവാന്‍മാരുമായുണ്ടായ ഏറ്റുമുട്ടലില്‍ 15 മാവോവാദികള്‍ കൊല്ലപ്പെട്ടതായി റിപ്പോര്‍ട്ട്. ഛത്തിസ്ഗഡില്‍ കഴിഞ്ഞ അഞ്ചു ദിവസമായി നടത്തിയ തെരച്ചിലിനിടയിലുണ്ടായ ഏറ്റുമുട്ടലിലാണ് മാവോവാദികളെ വധിച്ചതെന്ന് സി.ആര്‍.പി.എഫ് അറിയിച്ചു. മാവോ വാദികളുടെ ആക്രമണത്തില്‍ ഒരു ജവാന്‍ മരിക്കുകയും രണ്ടുപേര്‍ക്ക് പരുക്കേല്‍ക്കുകയും ചെയ്തതായും കേന്ദ്ര സേനാ വക്താവ് ഡല്‍ഹിയില്‍ അറിയിച്ചു.

തമിഴ്‌നാട്

യുവതിയെ
ഭര്‍ത്താവ് ബസില്‍
കുത്തിക്കൊന്നു

കോയമ്പത്തൂര്‍: കുടുംബ വഴക്കിനെത്തുടര്‍ന്ന് വീട് വിട്ടിറങ്ങിയ യുവതിയെ ഭര്‍ത്താവ് ബസില്‍ വച്ച് കുത്തിക്കൊലപ്പെടുത്തി. മേട്ടുപ്പാളയത്തുവച്ചാണ് 18 കാരിയായ ആനന്ദിയെന്ന യുവതിയെ കുത്തിക്കൊലപ്പെടുത്തിയത്. ഭര്‍ത്താവിന്റെ മര്‍ദനത്തില്‍ പരുക്കേറ്റ ആനന്ദിയെയും കൊണ്ട് ഇവരുടെ മാതാവ് മേട്ടുപ്പാളയത്തെ ആശുപത്രിയിലേക്ക് പോകുമ്പോഴാണ് ഭര്‍ത്താവ് ഉദയകുമാര്‍ അക്രമിച്ചത്.
മൂന്ന് മാസം മുന്‍പായിരുന്നു ഇവരുടെ വിവാഹം. പെയിന്റിങ് തൊഴിലാളിയായ ഉദയകുമാര്‍ ജോലിക്ക് പോകാത്തത് ചോദ്യം ചെയ്തതാണ് ഇരുവരും തമ്മില്‍ വഴക്കുണ്ടാകാന്‍കാരണം.
ഭാര്യയോട് വീട്ടിലേക്ക് തിരിച്ചുവരാന്‍ ഇയാള്‍ ആവശ്യപ്പെട്ടെങ്കിലും ഇത് നിരസിച്ചതാണ് കൊലപ്പെടുത്താന്‍ കാരണമെന്ന് പൊലിസ് അറിയിച്ചു. ഒളിവില്‍ പോയ ഉദയകുമാറിനുവേണ്ടി പൊലിസ് തിരച്ചില്‍ തുടങ്ങിയിട്ടുണ്ട്.