കോഴിക്കോട്: ആവര്‍ത്തിക്കുന്ന വ്യാജ ഏറ്റുമുട്ടല്‍ കൊലകളിലൂടെ കേരളത്തെ ഭീകര സംസ്ഥാനമാക്കി മാറ്റാനാണ് കേന്ദ്രവും സംസ്ഥാനവും ശ്രമിക്കുന്നതെന്ന് ദേശീയ മനുഷ്യാവകാശ ഏകോപന സമിതി (എന്‍.സി.എച്ച്.ആര്‍.ഒ) വാര്‍ത്താ സമ്മേളനത്തില്‍ ആരോപിച്ചു. മോദി ഗുജറാത്തില്‍ നടത്തിയ വ്യാജ ഏറ്റുമുട്ടല്‍ കൊലപാതക പരമ്പരയ്ക്കു തുല്യമായ ഭീകരതയാണ് ഇപ്പോള്‍ കേരളത്തില്‍ നടമാടുന്നതെന്നും ഭാരവാഹികള്‍ പറഞ്ഞു. എല്‍.ഡി.എഫ് സര്‍ക്കാര്‍ അധികാരമേറ്റ ശേഷം അട്ടപ്പാടിയിലെ ഫോട്ടോഗ്രാഫര്‍ ബെന്നി ഉള്‍പ്പെടെ ഒമ്പതു പേരാണ് വ്യാജ ഏറ്റുമുട്ടലില്‍ കൊല്ലപ്പെട്ടത്.
സംസ്ഥാനത്തു നടന്ന വ്യാജ ഏറ്റുമുട്ടലുകളില്‍ ഒന്നിന്റെയും വസ്തുത പുറത്തുവന്നിട്ടില്ല. സുപ്രിംകോടതി നിര്‍ദേശപ്രകാരമുള്ള ചട്ടങ്ങള്‍ പോലും സര്‍ക്കാര്‍ പാലിച്ചിട്ടില്ല. വേല്‍മുരുകന് വെടിയേറ്റത് വളരെ അടുത്തുനിന്നും പിന്നില്‍ നിന്നുമാണ്. കോടിക്കണക്കിന് രൂപയാണ് കേന്ദ്രത്തില്‍ നിന്നും മാവോയിസ്റ്റ്‌വേസ്റ്റയ്ക്കായി കേരളം വാങ്ങുന്നത്. 2019-20 വര്‍ഷത്തില്‍ മാത്രം രണ്ടേമുക്കാല്‍ കോടിയിലേറെയാണ് സര്‍ക്കാരിന് ലഭിച്ചത്. നിലമ്പൂരിലും മഞ്ചക്കണ്ടിയിലും നേരത്തെ വയനാട്ടിലും കീഴടങ്ങാനും പിടികൂടാനും കഴിയുമായിരുന്ന ആളുകളെ തണ്ടര്‍ബോള്‍ട്ട് വെടിവച്ചു കൊല്ലുകയായിരുന്നു. ഇത്തരം ഭരണകൂട ഭീകരതകള്‍ക്കെതിരേ മുഴുവന്‍ ജനാധിപത്യവിശ്വാസികളും ഒന്നിക്കുകയും ശബ്ദിക്കുകയും ചെയ്യണമെന്ന് ദേശീയ മനുഷ്യാവകാശ ഏകോപന സമിതി പറഞ്ഞു. വാര്‍ത്താസമ്മേളനത്തില്‍ വിളയോടി ശിവന്‍കുട്ടി, റെനി ഐലിന്‍, കെ.പി.ഒ റഹ്മത്തുല്ല, എം.കെ ശറഫുദ്ദീന്‍ പങ്കെടുത്തു.