പാലക്കാട്: മലയാളികളുടെ തിരോധാനവുമായി ബന്ധപ്പെട്ട് മൂന്നു പാലക്കാട് സ്വദേശികളുടെ പേരില്‍ യു.എ.പി.എ ചുമത്തി. പാലക്കാട് കഞ്ചിക്കോട് സ്വദേശികളായ ഷിബി, സഹോദരന്മാരായി ഈസ, യഹിയ എന്നിവര്‍ക്കെതിരെയാണ് അന്വേഷണസംഘം യു.എ.പി.എ ചുമത്തിയത്. മലയാളികളുടെ തിരോധാനവുമായി ബന്ധപ്പെട്ട് മുംബൈയില്‍ അറസ്റ്റിലായ അര്‍ഷി ഖുറൈഷി, റിസ്‌വാന്‍ ഖാന്‍ എന്നിവരുടെ മൊഴിയുടെ അടിസ്ഥാനത്തിലാണ് പൊലിസ് യു.എ.പി.എ ചുമത്തിയത്.

മെര്‍ലിന്റെ സഹോദരനായ കൊച്ചി തമ്മനം സ്വദേശി എബിന്‍ ജേക്കബ് സഹോദരിയെ കാണാനില്ലെന്ന് ചൂണ്ടിക്കാട്ടി നല്‍കി പരാതിയിലാണ് പ്രത്യേക പൊലിസ് സംഘം അന്വേഷണം നടത്തുന്നത്. പാലക്കാട് സ്വദേശിയായ ബെസ്റ്റിന്‍ വിന്‍സന്റ് എന്ന യഹിയയുടെ ഭാര്യയാണ് മെര്‍ലിന്‍. ഈസയുടെ ഭാര്യ ഫാത്തിമ എന്ന നിമിഷയെ കാണാതായ സംഭവത്തിലും ഇവരുടെ മാതാവായ ആറ്റുകാല്‍ സ്വദേശി ബിന്ദു മുഖ്യമന്ത്രിക്ക് പരാതി നല്‍കിയിരുന്നു.

അഞ്ചു സ്ത്രീകള്‍ ഉള്‍പ്പെടെ 15 മലയാളികളെ പടന്ന, തൃക്കരിപ്പൂര്‍ മേഖലയില്‍ കാണാതായ പരാതിയിലാണ് കാഞ്ഞങ്ങാട് ഡി.വൈ.എസ്.പി സുനില്‍ ബാബുവിന്റെ നേതൃത്വത്തില്‍ പൊലിസ് അന്വേഷണം പുരോഗമിക്കുന്നത്. തിരോധാനവുമായി ബന്ധപ്പെട്ട് കേന്ദ്ര ഏജന്‍സികളായ ഐ.ബിയും എന്‍.ഐ.എയും അന്വേഷണം നടത്തുന്നുണ്ട്.