തലയോലപ്പറമ്പ്: നിയന്ത്രണം വിട്ട കാര്‍ വഴിയരികില്‍ പാര്‍ക്ക് ചെയ്തിരുന്ന ബൈക്കുകളില്‍ ഇടിച്ചു മറിഞ്ഞു. ഇന്നലെ ഉച്ചകഴിഞ്ഞ് മൂന്നിന് തലയോലപ്പറമ്പ്-കോട്ടയം റോഡില്‍ കെ.ആര്‍ സ്ട്രീറ്റിനുസമീപത്താണ് അപകടം.
സെന്‍ട്രല്‍ ജങ്ഷനില്‍ നിന്നും ആശുപത്രിയിലേക്ക് പോവുകയായിരുന്ന കാര്‍ നിയന്ത്രണം വിട്ട് റോഡരുകില്‍ പാര്‍ക്ക് ചെയ്തിരുന്ന രണ്ട് ഇരുചക്ര വാഹനങ്ങള്‍ക്ക് മുകളിലേക്ക് പാഞ്ഞുകയറി മെയിന്‍ റോഡിനുകുറുകെ മറിയുകയായിരുന്നു.
കാര്‍ ഓടിച്ചിരുന്ന തലയോലപ്പറമ്പ് തേര്‍വഴിയില്‍ ഗോപാലകൃഷ്ണക്കുറുപ്പി(62)ന് കൈയ്ക്കും തലയ്ക്കും സാരമായി പരുക്കേറ്റു.
ഇയാളെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. അപകടത്തെ തുടര്‍ന്ന് കോട്ടയം റോഡില്‍ 15 മിനുട്ടോളം ഭാഗികമായി ഗതാഗതം തടസ്സപ്പെട്ടു. തലയോലപ്പറമ്പ് പൊലിസ് മേല്‍നടപടികള്‍ സ്വീകരിച്ചു.