തിരുവനന്തപുരം: അന്ധനായ ലോട്ടറി വില്‍പനക്കാരനെ കബളിപ്പിച്ച് ലോട്ടറി തട്ടിയെടുത്തയാള്‍ പിടിയില്‍. എറണാകുളം മരട് ചെമ്പക്കര ആയത്തുപറമ്പില്‍ വീട്ടില്‍ സുനില്‍കുമാറിനെ (47) ആണ് തമ്പാനൂര്‍ പൊലിസ് അറസ്റ്റ് ചെയ്തത്. ഇന്നലെ രാവിലെ തമ്പാനൂര്‍ റെയില്‍വേ സ്റ്റേഷനു സമീപത്തെ ഓട്ടോ സ്റ്റാന്‍ഡില്‍ നിന്നാണ് ഇയാളെ പിടികൂടിയത്. ലോട്ടറി വില്‍പനക്കാരനെ കബളിപ്പിച്ച് ടിക്കറ്റുമായി പോകുന്ന വിഡിയോ ഇയാളെ തിരിച്ചറിയാന്‍ സഹായകമായി. അടുത്തിടെ മോഷണക്കേസില്‍ ജയിലില്‍ നിന്ന് പുറത്തിറങ്ങിയ ആളാണ് സുനിലെന്ന് പൊലിസ് പറഞ്ഞു.
വെള്ളിയാഴ്ച ഉച്ചയ്ക്ക് രണ്ടിന് തമ്പാനൂര്‍ ബസ് ടെര്‍മിനലില്‍ അന്ധനായ ലോട്ടറി വില്‍പനക്കാരനെ കബളിപ്പിച്ചാണ് ഇയാള്‍ കടന്നുകളഞ്ഞത്. ലോട്ടറി വാങ്ങാനെന്ന വ്യാജേന അടുത്തുകൂടി വില്‍പനക്കാരന്റെ കൈയില്‍നിന്ന് ടിക്കറ്റ് കൈക്കലാക്കിയ ശേഷം പണം നല്‍കാതെ സ്ഥലം വിടുകയായിരുന്നു. വര്‍ഷങ്ങളായി തലസ്ഥാനത്ത് ലോട്ടറിക്കച്ചവടം നടത്തുന്ന വാഴച്ചല്‍ ചിറയാണിക്കര ഗീതാഭവനില്‍ സുരയില്‍ നിന്നാണ് ഇയാള്‍ ലോട്ടറി തട്ടിയെടുത്തത്.

നിരീക്ഷണ കാമറയില്‍ ഇയാളുടെ ദൃശ്യം പതിഞ്ഞിനാല്‍ പ്രതിയെ വേഗത്തില്‍ കണ്ടെത്താനായി. 640 രൂപ വിലയുള്ള 23 ടിക്കറ്റുകളാണ് ഇയാള്‍ കൈക്കലാക്കിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.