കൊച്ചി: വഖ്ഫ് നിയമത്തില്‍ കാലോചിതമായ മാറ്റം വരുത്തണമെന്ന് കേരള മുസ്‌ലിം ജമാഅത്ത് കൗണ്‍സില്‍ സംസ്ഥാന പ്രസിഡന്റ് അഡ്വ. എ. പൂക്കുഞ്ഞ് വാര്‍ത്താസമ്മേളനത്തില്‍ ആവശ്യപ്പെട്ടു. വഖ്ഫ് വസ്തു അപഹരിച്ചെടുക്കുന്നവര്‍ക്കെതിരേ ക്രിമിനല്‍ നടപടികള്‍ എടുക്കത്തക്ക വിധമായിരിക്കണം ഭേദഗതിയെന്നും അദ്ദേഹം പറഞ്ഞു.
മുത്വലാഖ് ബില്ലിലെ പീനല്‍ ക്ലോസ് ഒഴിവാക്കി പുതിയ ബില്ല് അവതരിപ്പിക്കണം.അഞ്ച് ലക്ഷം രൂപ വരെ വാര്‍ഷിക വരുമാനമുള്ള മുസ്‌ലിം പള്ളികളിളെയും വഖ്ഫ് സ്ഥാപനങ്ങളെയും ബോര്‍ഡില്‍ വിഹിതം അടയ്ക്കുന്നതില്‍ നിന്നും ഒഴിവാക്കി ആക്ട് ഭേദഗതി ചെയ്യണമെന്നും അദ്ദേഹം ആവശ്യപ്പെട്ടു. വര്‍ക്കിങ് പ്രസിഡന്റ് സി.ഐ പരീത്, ട്രഷറര്‍ മാവുടി മുഹമ്മദ് ഹാജി, ജില്ലാ പ്രസിഡന്റ് കാരോത്തുകുഴി ഹൈദ്രോസ് ഹാജി, അബ്ദുല്ല മാറമ്പള്ളി എന്നിവരും വാര്‍ത്താസമ്മേളനത്തില്‍ പങ്കെടുത്തു.