കൊച്ചി: ബാങ്കില്‍ നിന്നും വായ്പയെടുത്ത തുക അടയ്ക്കുന്നതില്‍ നിന്ന് ഒഴിവാക്കണമെന്ന അപേക്ഷയുമായി കുന്നത്തുനാട് താലൂക്കില്‍ സംഘടിപ്പിച്ച പരിഹാരം 2017 ല്‍ എത്തിയ ഐക്കരനാട് വില്ലേജിലെ രാജി മണിയ്ക്ക് ഡെപ്യൂട്ടി കലക്ടര്‍ കെ.കെ സിദ്ധാര്‍ത്ഥന്റെ മനുഷ്യത്വപൂര്‍ണമായ സമീപനം തുണയായി. വീട് പണിയുന്നതിനായി ഐക്കരനാട് സര്‍വീസ് സഹകരണബാങ്കില്‍ നിന്ന് 1.25 ലക്ഷം രൂപ വായ്പയാണു രാജി മണി എടുത്തിരുന്നത്.
മകള്‍ രോഗിയാണെന്നും കൂലിപ്പണിക്ക് പോയി ജീവിതവൃത്തി നയിക്കുന്ന തനിക്ക് വായ്പാതുക തിരിച്ചടയ്ക്കാന്‍ ബുദ്ധിമുട്ടാണെും രാജി മണി അപേക്ഷയില്‍ പറഞ്ഞു. മറ്റ് ആശ്രയങ്ങളോ സാമ്പത്തികസഹായമോ തനിക്കില്ലെന്നും അപേക്ഷക പറഞ്ഞു.
അപേക്ഷ പരിശോധിച്ച ഡെപ്യുട്ടി കലക്ടര്‍ 25000 രൂപ സ്വന്തം കൈയില്‍ നിന്നും അടയ്ക്കാമെന്ന് അറിയിക്കുകയായിരുന്നു. ബാക്കി ഒരു ലക്ഷം രൂപ വായ്പ തിരിച്ചടയ്ക്കാനുള്ള സ്‌പോണ്‍സര്‍മാരെ കണ്ടെത്താന്‍ ഡെപ്യുട്ടി തഹസില്‍ദാര്‍ക്ക് നിര്‍ദേശം നല്‍കി. പലിശയിനത്തിലുള്ള തുക ഒഴിവാക്കാന്‍ ബാങ്കിന് നിര്‍ദേശം നല്‍കി.