കൊച്ചി: കുട്ടികളൊരുക്കിയ കൂറ്റന്‍ ചിത്രവിരുന്നു കാണാന്‍ ആയിരങ്ങള്‍. രവിപുരം ഇന്ത്യന്‍ സ്‌കൂള്‍ ഓഫ് ആര്‍ട്‌സിലായിരുന്നു കുട്ടികള്‍ കൂറ്റന്‍ ക്യാന്‍വാസില്‍ വിസ്മയംതീര്‍ത്തത്.
അവധിക്കാല ക്ലാസുകളുടെ ഭാഗമായി അമ്പതോളം കുട്ടികളാണു ചിത്രരചനയില്‍ പങ്കെടുത്തത്. വനസംരക്ഷണത്തിന്റെയും വൃക്ഷപരിപാലനത്തിന്റെയും പ്രാധാന്യം കുട്ടികള്‍ക്ക് പകര്‍ന്നുനല്‍കാനാണ് വേറിട്ട ചിത്രരചന സംഘടിപ്പിച്ചത്. ആറുമുതല്‍ 17 വരെ പ്രായമുള്ള കുട്ടികള്‍ രണ്ടുദിവസംകൊണ്ടാണ് ചിത്രം പൂര്‍ത്തിയാക്കിയത്. കാടും ചെടികളും നദിയും പക്ഷിമൃഗാദികളുമെല്ലാം ക്യാന്‍വാസില്‍ നിറഞ്ഞു.
ക്യാമ്പില്‍ പങ്കെടുത്ത കുട്ടികള്‍ക്ക് ചെടികളുടെ വിത്തുകള്‍ അടങ്ങിയ കടലാസുകൊണ്ട് നിര്‍മിച്ച പേനയാണ് സമ്മാനമായി നല്‍കിയത്. കുട്ടികള്‍ വരച്ച കൂറ്റന്‍ ചിത്രത്തിന്റെ പ്രദര്‍ശനം ശനിയാഴ്ചവരെ ഉണ്ടാകും. രാവിലെ 10 മുതല്‍ അഞ്ചുവരെയാണ് പ്രദര്‍ശനം.