വടക്കാഞ്ചേരി: മുണ്ടത്തിക്കോട് മെഡിക്കല്‍ കോളജ് റോഡ് അടിയന്തിരമായി ടാറിങ് നടത്തി ഗതാഗതയോഗ്യമാക്കാന്‍ ഹൈക്കോടതി ഉത്തരവ്.
അഡ്വ. ഗംഗേഷ് ബാലകൃഷ്ണന്‍ മുഖേന അനില്‍ അക്കര എം.എല്‍.എ നല്‍കിയ പ്രത്യേക ഹര്‍ജി പരിഗണിച്ചു കൊണ്ടാണ് കോടതിയുടെ സുപ്രധാന ഉത്തരവ്. എസ്റ്റിമേറ്റ് നിരക്കില്‍ തന്നെ ടാറിങ് നടത്തണമെന്നും കോടതി ഉത്തരവില്‍ പറയുന്നു. മെഡിക്കല്‍ കോളജ് റോഡ് ബി.എം.ബി.സി മോഡല്‍ ടാറിങ് നടത്തുന്നതിന് ഒന്നര കോടി രൂപയാണ് അനുവദിച്ചിരുന്നത്.
എന്നാല്‍ 10 ശതമാനം തുക കൂട്ടി നല്‍കണമെന്ന് ആവശ്യപ്പെട്ട് കാരാറുകാരന്‍ വ്യവഹാര നടപടികളിലേക്ക് നീങ്ങുകയും നിര്‍മാണ പ്രവര്‍ത്തനങ്ങള്‍ സ്തംഭിക്കുകയുമായിരുന്നു.
ഇതിനെ തുടര്‍ന്നാണ് അനില്‍ അക്കര എം.എല്‍.എ ഹൈക്കോടതിയില്‍ പ്രത്യേക ഹര്‍ജി നല്‍കിയത്. കോടതി ഉത്തരവ് നടപ്പാകുന്നതോടെ ഈ പ്രദേശത്തെ വലിയ ദുരിതത്തിനു പരിഹാരമാകുമെന്നാണ് പ്രതീക്ഷ.