മലപ്പുറം: മഞ്ചേരി മെഡിക്കല്‍ കോളേജ് ആശുപത്രിയില്‍ നവജാത ശിശുക്കളെയും അമ്മമാരെയും വരാന്തയില്‍ കിടത്തി ചികിത്സിക്കുന്നതിനെതിരേ സംസ്ഥാന മനുഷ്യാവകാശ കമ്മിഷന്‍ അന്വേഷണത്തിന് ഉത്തരവിട്ടു. മെഡിക്കല്‍ വിദ്യാഭ്യാസ ഡയറക്ടറും ആരോഗ്യവകുപ്പ് സെക്രട്ടറിയും മഞ്ചേരി മെഡിക്കല്‍ കോളജ് സൂപ്രണ്ടും സംഭവത്തെക്കുറിച്ച് അന്വേഷിച്ച് ഒരു മാസത്തിനകം വിശദീകരണം നല്‍കണമെന്നു കമ്മിഷന്‍ അംഗം കെ. മോഹന്‍കുമാര്‍ ആവശ്യപ്പെട്ടു.
അണുബാധപോലുള്ള ഗുരുതര ഭീഷണികള്‍ നിലനില്‍ക്കേയാണ് തിക്കുംതിരക്കുമുള്ള ആശുപത്രി വരാന്തയില്‍ നവജാത ശിശുക്കളെ കിടത്തിയിരിക്കുന്നത്. പ്രസവ ശസ്ത്രക്രിയ കഴിഞ്ഞവര്‍ കിടക്കുന്നതും വഴിയിലാണ്. ദിവസവും ഇരുപതോളം പ്രസവങ്ങള്‍ നടക്കുന്ന ആശുപത്രിയാണ് മഞ്ചേരി മെഡിക്കല്‍ കോളജ്. പ്രസവ വാര്‍ഡില്‍ സ്ഥലമില്ലാത്തതിനാലാണ് ഇവരെ വരാന്തയില്‍ കിടത്തിയിരിക്കുന്നതെന്നാണ് അധികൃതര്‍ പറയുന്നത്. മാധ്യമവാര്‍ത്തയുടെ അടിസ്ഥാനത്തില്‍ കമ്മിഷന്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി.