മലപ്പുറം: രണ്ട് ദിവസങ്ങളിലായി നടക്കുന്ന പൂക്കോട്ടൂര്‍ ഹജ്ജ് ക്യാംപ് ഇന്നു തുടങ്ങും. പി.കെ.എം.ഐ.സി കാംപസില്‍ സജ്ജമാക്കിയ നഗരിയില്‍ രാവിലെ ഒന്‍പതിന് ആരംഭിക്കുന്ന ക്യാംപ് സമസ്ത കേരളാ ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. സ്വാഗതസംഘം ചെയര്‍മാന്‍ പാണക്കാട് സയ്യിദ് സ്വാദിഖലി ശിഹാബ് തങ്ങള്‍ അധ്യക്ഷനാകും. സംസ്ഥാനത്തിന്റെ വിവിധ ഭാഗങ്ങളില്‍ നിന്നെത്തുന്ന പതിനായിരത്തോളം വരുന്ന തീര്‍ഥാടകര്‍ സംഗമിക്കുന്ന പഠന ക്യാംപിന് എസ്.വൈ.എസ് സംസ്ഥാന സെക്രട്ടറി അബ്ദുസ്സമദ് പൂക്കോട്ടൂര്‍ നേതൃത്വം നല്‍കും.
രണ്ടാം ദിവസത്തെ ക്യാംപ് പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത കേരളാ ജംഇയ്യത്തുല്‍ ഉലമാ ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍, പാണക്കാട് സയ്യിദ് അബ്ബാസലി ശിഹാബ് തങ്ങള്‍, പി.കെ.കുഞ്ഞാലിക്കുട്ടി, വഖ്ഫ്‌ബോര്‍ഡ് ചെയര്‍മാന്‍ സയ്യിദ് റശീദലി ശിഹാബ് തങ്ങള്‍, കേരളാ ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ്മൗലവി, സയ്യിദ് ഹമീദലി ശിഹാബ് തങ്ങള്‍, സയ്യിദ് ബശീറലി ശിഹാബ് തങ്ങള്‍, സയ്യിദ് മുനവ്വറലി ശിഹാബ് തങ്ങള്‍, എം.പിമാരായ ഇ.ടി മുഹമ്മദ് ബശീര്‍, പി.വി അബ്ദുല്‍ വഹാബ്, എം.എല്‍.എമാരായ ടി.വി ഇബ്‌റാഹീം, പി. ഉബൈദുല്ല തുടങ്ങിയവര്‍ പങ്കെടുക്കും. ഹജ്ജ് ഗൈഡ്, സി.ഡി എന്നിവയുടെ പ്രകാശനവും നടക്കും. നാളെ വൈകീട്ട് നാലിനു കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കുന്ന പ്രാര്‍ഥനാ സമ്മേളനത്തോടെ ക്യാംപ് സമാപിക്കും