പെരുമാതുറ: പെരുമാതുറ മുതലപ്പൊഴി ഹാര്‍ബറില്‍ മാസങ്ങള്‍ക്ക് ശേഷം അദാനിയുടെ ശാന്തിസാഗര്‍ 14 വീണ്ടും ഡ്രഡ്ജിങ് ആരംഭിച്ചു. ഒപ്പം അദാനിക്കുവേണ്ടി മുതലപ്പൊഴി തീരത്ത് നിര്‍മിക്കുന്ന ബോട്ട് ജെട്ടിയുടെ (വാര്‍ഫ്) നിര്‍മാണവും പുരോഗമിക്കുന്നു.
തുടക്കത്തില്‍ ഡ്രജര്‍ ഉപയോഗിച്ച് അഴിമുഖത്തെ മണല്‍ മാറ്റല്‍ ആരംഭിച്ചിരുന്നു. ഇതിനുശേഷം അദാനിയുടെ ബോട്ടുജെട്ടിയുടെ നിര്‍മാണം തുടങ്ങിയതോടെ മുതലപ്പൊഴി ടൂറിസത്തിന് തിരച്ചടിയാകുമെന്ന വാദത്താല്‍ നാട്ടുകാര്‍ വാര്‍ഫ് നിര്‍മാണത്തിനെതിരേ സമരങ്ങള്‍ നടത്തിയിരുന്നു. ഇതോടെ ഡ്രജര്‍ മാറ്റി കൊണ്ടുപോകുകയും തുടര്‍ പ്രവര്‍ത്തനങ്ങള്‍ സ്തംഭിക്കുകയും ചെയ്തു.
ഇതിനുശേഷം മന്ത്രിതലത്തില്‍ ജനപ്രതിനിധികളും പ്രതിഷേധക്കാരും അദാനി പ്രതിനിധികളും ചര്‍ച്ചകള്‍ നടത്തിയതോടെ ഒരുമാസം മുമ്പ് തന്നെ വാര്‍ഫ് നിര്‍മാണത്തിന് തുടക്കമായത്.
എന്നാല്‍ അഴിമുഖത്തെ ശക്തമായ തിരമാല കാരണം ഹാര്‍ബറിനുള്ളിലെ മണല്‍ മാറ്റല്‍ നടക്കാതെ വന്നു.
കടല്‍ ശാന്തമായതോടെ കഴിഞ്ഞ ദിവസം വീണ്ടും ശാന്തി സാഗറിന് അനക്കം വച്ചത്. സര്‍ക്കാരുമായിട്ടുള്ള ധാരണയില്‍  വിഴിഞ്ഞം തുറഖമുഖത്തിന് ആവശ്യമായ കൂറ്റന്‍ പാറകള്‍ കടല്‍ മാര്‍ഗം കൊണ്ടുപോകുന്നതിനാണ് ബോട്ടുജെട്ടിയുടെ നിര്‍മിക്കുന്നത്. ഡ്രജിങ് നടത്തി മണല്‍ കുഴിച്ച് മാറ്റുന്നതോടെ  മുതലപ്പൊഴി അടിക്കടിയുണ്ടാകുന്ന ബോട്ടപകടങ്ങള്‍ കുറക്കുന്നതിന് സഹായമാകും. ഡ്രജിങും വാര്‍ഫ് നിര്‍മാണവും കൂട്ടായി നടക്കുമ്പോള്‍ നാടിന്റെ വികസനവും ഹാര്‍ബറിലെ അപകടങ്ങള്‍ കുറച്ച് മത്സ്യതൊഴിലാളികളുടെ സുരക്ഷിതത്വം ഉറപ്പാക്കാനാകും. മുതലേെപ്പാഴിയുടെ അശാസ്ത്രീയ നിര്‍മാണം കാരണം അഴിമുഖത്ത് മണല്‍ അടഞ്ഞ് ആഴകുറവ് കാരണം വള്ളങ്ങള്‍ മറിഞ്ഞ് നിരന്തരം ബോട്ടുപകടങ്ങളുണ്ടാകുകയും ഇരുപതിലധികം മത്സ്യതൊഴിലാളികളുടെ ജീവന്‍ കടല്‍ അപഹരിക്കുകയും ചെയ്തിരുന്നു.
ഇതോടെ മത്സ്യതൊഴിലാളികള്‍ റോഡ് ഉപരോധവും വാഹനങ്ങള്‍ തടയല്‍ ഉള്‍പ്പെട ശക്തമായ പ്രതിഷേധവുമായി രംഗത്ത് വന്നിരുന്നു. തുടര്‍ന്ന് സര്‍ക്കാര്‍ ശാശ്വാതപരിഹാരം കാണാന്‍ പല ഡ്രജിങ് കമ്പനികളും കൊണ്ടുവന്നെങ്കിലും എല്ലാം പരാജയപ്പെട്ടു.
ഇതിനിടയിലാണ് അദാനിയുടെ അത്യാധുനിക സംവിധാനമുള്ള ശാന്തിസാഗര്‍ പരമ്പരയിലുള്ള ഡ്രജര്‍ മുതലപ്പൊഴിയുടെ രക്ഷക്കെത്തിയത്.
സാധാരണ ഡ്രജര്‍ മണല്‍ കുഴിച്ച് കരയ്ക്കടിപ്പിക്കുമ്പോള്‍ ഇത് ഉപയോഗിച്ച് ഡ്രജ് ചെയ്യുന്ന മണല്‍ ഇതിനകത്ത് ശേഖരിച്ച് ഉള്‍ക്കടലില്‍ നിക്ഷേപിക്കാന്‍ കഴിയുമെന്ന പ്രത്യേകതയുമുണ്ട്.