ഫറോക്ക്: സമസ്തയുടെ മദ്‌റസ പാഠപുസ്തകങ്ങള്‍ കാഴ്ചപരിമിതരായ വിദ്യാര്‍ഥികള്‍ക്കും ഇനി വായിക്കാം. അസ്സബാഹ് സൊസൈറ്റി ഫോര്‍ ദി ബ്ലൈന്‍ഡാണ് സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡിന്റെ കീഴിലുള്ള മദ്‌റസകളിലെ പാഠപുസ്തകങ്ങള്‍ ഇറക്കിയത്. സംസ്ഥാനത്ത് ആദ്യമായാണ് ബ്രെയില്‍ ലിപി പകര്‍പ്പുകള്‍ അച്ചടിച്ച് വിതരണം ചെയ്യുന്നത്.
ആദ്യഘട്ടത്തില്‍ 5, 7, 10, 12 പൊതുപരീക്ഷാ ക്ലാസുകളിലെ മുഴുവന്‍ പാഠപുസ്തകങ്ങളാണ് ബ്രെയില്‍ ലിപിയിലേക്ക് അച്ചടിക്കുന്നത്.
സമസ്ത കേരളാ ഇസ്‌ലാം മത വിദ്യാഭ്യാസ ബോര്‍ഡ് മാനേജര്‍ കെ. മോയിന്‍കുട്ടി മാസ്റ്റര്‍ പുസ്തകങ്ങള്‍ വിദ്യാര്‍ഥികള്‍ക്ക് നല്‍കി പ്രകാശനം ചെയ്തു. ഡോ. കോയക്കുട്ടി ഫാറൂഖി അധ്യക്ഷനായി. അസ്സബാഹ് സംസ്ഥാന പ്രസിഡന്റ് പി.എ അബ്ദുല്‍ കരീം റിപ്പോര്‍ട്ട് അവതരിപ്പിച്ചു. അഡൈ്വസര്‍ എ. അബ്ദുല്‍റഹീം ചാലിയം പദ്ധതി വിശദീകരിച്ചു.
കെ.കെ ആലിക്കുട്ടി മാസ്റ്റര്‍, ചേക്കുട്ടി പന്തല്ലൂര്‍, അബ്ദുല്‍ മജീദ് പാങ്ങില്‍, പി. ഹംസ മൗലവി, എസ്.എ നൗഷാദ് കിണാശേരി, സെക്രട്ടറി പി.ടി മുഹമ്മദ് മുസ്തഫ അബ്ദുസമദ് സംസാരിച്ചു.