മൊഗാദിഷു: സൊമാലിയന്‍ തലസ്ഥാനമായ മൊഗാദിഷുവില്‍ കഴിഞ്ഞ ദിവസമുണ്ടായ ഇരട്ട ചാവേര്‍ സ്‌ഫോടനത്തില്‍ ചാവേറായതു മുന്‍ എം.പിയെന്ന് അല്‍ശബാബ്. അല്‍ഖാഇദയുമായി ബന്ധമുള്ള അല്‍ശബാബ് നേരത്തെ ആക്രമണത്തിന്റെ ഉത്തരവാദിത്തം ഏറ്റെടുത്തിരുന്നു. സംഭവത്തില്‍ ഏഴു യു.എന്‍ ഗാര്‍ഡുകളടക്കം 13പേരാണ് കൊല്ലപ്പെട്ടിരുന്നത്.
മൊഗാദിഷു അന്താരാഷ്ട്ര വിമാനത്താവളത്തിനടുത്തുണ്ടായ സ്‌ഫോടനം നടത്തിയതു രാജ്യത്തെ മുന്‍ പാര്‍ലമെന്റംഗംകൂടിയായ ചാവേറാണെന്നാണ് അല്‍ശബാബിന്റെ വാദം. സലാഹ് നൂഹ് ഇസ്മാഈല്‍ എന്നറിയപ്പെടുന്ന സലാഹ് ബല്‍ബാദോയാണ് ചാവേറെന്നും സംഘടന വ്യക്തമാക്കി. അല്‍ശബാബ് മിലിട്ടറി ഓപറേഷന്‍ വക്താവ് ഷെയ്ഖ് അബ്ദുയാസിസ് അബൂ മുസാബ് ആണ് ഇക്കാര്യം പുറത്തുവിട്ടത്.
2010ല്‍ എം.പി സ്ഥാനം ഒഴിഞ്ഞതിനു ശേഷമാണ് ഇസ്മാഈല്‍ അല്‍ശബാബില്‍ ചേര്‍ന്നത്. സൊമാലിയന്‍ പ്രസിഡന്റ് ഷെയ്ഖ് ഷരീഫ് അഹമ്മദിന്റെ നാമനിര്‍ദേശത്തിലൂടെ പാര്‍ലമെന്റിലെത്തിയ 275 അംഗങ്ങളില്‍ ഒരാളായിരുന്നു സലാഹ് നൂഹ് ഇസ്മാഈല്‍. എന്നാല്‍, രണ്ടാമത്തെ ചാവേര്‍ ആക്രമണത്തിനു നേതൃത്വം നല്‍കിയത് ആരെന്ന് അല്‍ശബാബ് വ്യക്തമാക്കിയിട്ടില്ല.