ഒരു ബൂത്തില്‍ രണ്ട് കുപ്പികള്‍
ചെലവ് 85 ലക്ഷം
മലപ്പുറം: ചൂണ്ട് വിരലിലെ വോട്ട് അടയാളത്തിന് ഇത്തവണ മൈസൂരില്‍ നിന്നെത്തിക്കുന്നത് 86,000 മഷിക്കുപ്പികള്‍. കര്‍ണാടകയിലെ മൈസൂര്‍ പെയിന്റ്‌സ് ആന്‍ഡ് വാര്‍ണിഷ് ലിമിറ്റഡ് കമ്പനിയില്‍ നിന്നാണ് 85 ലക്ഷം രൂപ ചെലവില്‍ തെരഞ്ഞെടുപ്പ് കമ്മിഷന്‍ വോട്ടുമഷി എത്തിക്കുന്നത്.
ഒരു ബൂത്തില്‍ അഞ്ചുമില്ലീലിറ്റര്‍ അടങ്ങിയ രണ്ടു മഷിക്കുപ്പികളാണ് ഇത്തവണ നല്‍കുന്നത്. വോട്ട് ചെയ്യുന്നതിന് മുന്‍പ് കൈകളില്‍ സാനിറ്റൈസര്‍ ഉപയോഗിച്ചാലും മഷി ഇളകിപ്പോകില്ല. 2015-ല്‍ ഒരു ബൂത്തില്‍ മൂന്ന് മഷിക്കുപ്പികള്‍ നല്‍കിയിരുന്നു.
1,23,600 ലക്ഷം മഷിക്കുപ്പികളാണ് 2015 ലെ തദ്ദേശ തെരഞ്ഞെടുപ്പില്‍ എത്തിച്ചിരുന്നത്. എന്നാല്‍ ഇത്രയും ഉപയോഗിക്കേണ്ടി വന്നില്ല.
അഞ്ച് ക്യൂബിക് സെന്റീമീറ്റര്‍ വലിപ്പമുള്ള കുപ്പികളിലാണ് വോട്ടിങ് മഷി നിറച്ചെത്തുന്നത്. ഒരു കുപ്പിക്ക് 87 രൂപയും നികുതിയും നല്‍കിയാണ് മൈസൂരില്‍ നിന്നു തെരഞ്ഞെടുപ്പ് കമ്മിഷന്‍ എത്തിക്കുന്നത്. വോട്ടിങ് മഷിക്ക് വയലറ്റു നിറമാണുള്ളത്. എന്നാല്‍ ഉണങ്ങിക്കഴിഞ്ഞാല്‍ കറുപ്പോ തവിട്ടോ നിറമായി മാറും.
മഷിയുടെ രാസഘടന സംബന്ധിച്ച വിവരങ്ങള്‍ അധികൃതര്‍ പുറത്തു വിടാറില്ല.
നാഷണല്‍ ഫിസിക്കല്‍ ലബോറട്ടറിയിലെ ഗവേഷകര്‍ക്കും മൈസൂര്‍ കമ്പനിയുടെ ഉന്നതര്‍ക്കും മാത്രമാണ് വിവരങ്ങള്‍ അറിയാവുന്നത്.
ഏറെ സുരക്ഷാ ക്രമീകരണങ്ങളോടെ അതീവ രഹസ്യമായാണ് മഷിയുടെ നിര്‍മാണ പ്രവര്‍ത്തനങ്ങള്‍ മൈസൂരില്‍ നടക്കുന്നത്. സില്‍വര്‍ നൈട്രേറ്റ് ആണ് വോട്ടിങ് മഷിയിലെ പ്രധാന ഘടകം.
നഖത്തിലെയും തൊലിപ്പുറത്തെയും കോശങ്ങള്‍ നശിച്ചു പുതിയവ രൂപപ്പെടുന്നതു വരെയും മഷിയുടെ അടയാളം നീണ്ടു നില്‍ക്കുമെന്നാണ് ഇതിന്റെ പ്രത്യേകത.

മഷി പുരണ്ട ചരിത്രം

58 വര്‍ഷം മുന്‍പാണ് രാജ്യത്ത് വോട്ടര്‍മാരുടെ വിരല്‍ തുമ്പില്‍ മഷി അടയാളപ്പെടുത്തി തെരഞ്ഞെടുപ്പ് തുടങ്ങിയത്. 1962-ലെ ലോക്‌സഭാ തെരഞ്ഞെടുപ്പിലാണ് വോട്ടിങ് മഷി ആദ്യമായി വോട്ടര്‍മാരുടെ വിരല്‍ തുമ്പില്‍ അടയാളപ്പെടുത്തി തെരഞ്ഞെടുപ്പ് കമ്മിഷന്‍ കളളവോട്ട് തടയാന്‍ ഉപായം കണ്ടെത്തിയത്.
തെരഞ്ഞടുപ്പ് കമ്മിഷന്‍ നിയമ മന്ത്രാലയം, നാഷണല്‍ ഫിസിക്കല്‍ ലബോറട്ടറി, നാഷണല്‍ റിസര്‍ച്ച് ഡെവലപ്‌മെന്റ് കോര്‍പറേഷന്‍ എന്നിവയുമായി സഹകരിച്ചാണ് കര്‍ണാടക സര്‍ക്കാരിന് കീഴില്‍ പ്രവര്‍ത്തിക്കുന്ന മൈസൂരിലെ മൈസൂര്‍ പെയിന്റ്‌സ് ആന്‍ഡ് വാര്‍ണിഷ് ലിമിറ്റഡ് കമ്പനി വോട്ടു മഷി നിര്‍മിക്കുന്നത്.