ദുബൈ: വിക്കറ്റിനു മുന്നിലും പിന്നിലും തിളങ്ങുന്ന ഇന്ത്യയുടെ ക്യാപ്റ്റന്‍ കൂള്‍ മഹേന്ദ്ര സിങ് ധോണി നായകനായി 200 ഏകദിന മത്സരം പൂര്‍ത്തിയാക്കി. കഴിഞ്ഞ ദിവസം അഫ്ഗാനിസ്താനെതിരേയുള്ള മത്സരത്തിലാണ് ധോണി ക്യാപ്റ്റനായി 200 മത്സരം പൂര്‍ത്തിയാക്കിയത്.
ഇതോടെ ഇന്ത്യയെ നയിക്കുന്ന പ്രായം കൂടിയ ക്യാപ്റ്റനെന്ന റെക്കോര്‍ഡും ധോണി സ്വന്തമാക്കി. മത്സരത്തില്‍ ആദ്യം ബാറ്റ് ചെയ്ത അഫ്ഗാനിസ്താന്‍ എട്ട് വിക്കറ്റ് നഷ്ടത്തില്‍ 252 റണ്‍സെടുത്തു. അഫ്ഗാന്‍ വിക്കറ്റ് കീപ്പറും ബാറ്റ്‌സ്മാനുമായ മുഹമ്മദ് ഷഹ്‌സാദ് 124 റണ്‍സെടുത്ത് മത്സരം അവിസ്മരണീയമാക്കി.
തുടക്കത്തില്‍ നാല് വിക്കറ്റ് നഷ്ടപ്പെട്ടെങ്കിലും നാലാം വിക്കറ്റില്‍ ഷഹ്‌സാദും നബിയും നടത്തിയ വെടിക്കെട്ട് ബാറ്റിങ്ങാണ് അഫ്ഗാന് മികച്ച സ്‌കോര്‍ നല്‍കിയത്. മറുപടി ബാറ്റിങ്ങിനിറങ്ങിയ ഇന്ത്യക്ക് ലോകേഷ് രാഹുലും അമ്പാട്ടി റായിഡുവും മികച്ച തുടക്കം നല്‍കി. രാഹുല്‍ 60 റണ്‍സും റായുഡു 57 റണ്‍സ് നേടി. 200-ാം മത്സരത്തില്‍ എട്ട് റണ്‍സ് മാത്രമാണ് ധോണിക്ക് സ്വന്തമാക്കാനായത്.