ഭോപ്പാല്‍: നിവാര്‍ ചുഴലിക്കാറ്റ് ഭീഷണിയെ തുടര്‍ന്ന് വ്യോമഗതാഗതം നിര്‍ത്തിവച്ചതോടെ ശസ്ത്രക്രിയ മുടങ്ങി യുവ ഡോക്ടര്‍ മരിച്ചു. മധ്യപ്രദേശ് സ്വദേശിയായ ഡോ ശുഭം ഉപാധ്യായയുടെ ശ്വാസകോശത്തെ വൈറസ് ബാധിച്ചതാണ് മരണത്തിന് കാരണമായത്.

മധ്യപ്രദേശിലെ ബുന്ദേല്‍ഖണ്ഡ് മെഡിക്കല്‍ കോളേജില്‍ കരാറടിസ്ഥാനത്തില്‍ പ്രവര്‍ത്തിച്ചു വരികയായിരുന്നു. കൊവിഡ് രോഗികളെ ചികിത്സിക്കുന്നതിനിടെയാണ് ഡോക്ടര്‍ക്ക് രോഗം സ്ഥിരീകരിച്ചത്.

രോഗം വഷളായതിനെത്തുടര്‍ന്ന് നവംബര്‍ 10 ന് ചിരായു മെഡിക്കല്‍ കോളജിലേക്ക് മാറ്റി. ശ്വാസകോശത്തെ കൊവിഡ് ഗുരുതരമായി ബാധിച്ചിരുന്നു. അവയവമാറ്റിവെക്കല്‍ ശസ്ത്രക്രിയ നടത്തുക മാത്രമായിരുന്നു ഡോക്ടറെ രക്ഷിക്കാന്‍ നിലവിലുണ്ടായിരുന്ന മാര്‍ഗം.

ഇതിനായി ചെന്നൈയിലേക്ക് വ്യോമമാര്‍ഗം അദ്ദേഹത്തെ എത്തിക്കാനുള്ള നടപടികള്‍ ആരംഭിച്ചു. എന്നാല്‍ നിവാര്‍ കൊടുങ്കാറ്റ് ഭീഷണിയെ തുടര്‍ന്ന് വ്യോമഗതാഗതം നിര്‍ത്തിവെച്ചതോടെ ശസ്ത്രക്രിയ മുടങ്ങി.

ചെന്നൈയിലെത്തിക്കാന്‍ സാധിച്ചിരുന്നെങ്കില്‍ കോവിഡ് പോരാട്ടത്തിന്റെ മുന്‍നിരയില്‍നിന്ന യുവ ഡോക്ടറുടെ ജീവന്‍ രക്ഷിക്കാന്‍ സാധിക്കുമായിരുന്നുവെന്ന് അദ്ദേഹത്തെ ചികത്സിച്ച ഡോ. അജയ് ഗോയങ്ക പറഞ്ഞു.