തിരുവനന്തപുരം: കാസര്‍കോട്-തിരുവനന്തപുരം ദേശീയപാത വികസനത്തിന്റെ കാര്യത്തില്‍ കേന്ദ്രസര്‍ക്കാര്‍ സ്വീകരിക്കുന്ന നിലപാട് അംഗീകരിക്കാനാവില്ലെന്ന് പൊതുമരാമത്ത് മന്ത്രി ജി. സുധാകരന്‍ നിയമസഭയില്‍ അറിയിച്ചു. മൂന്നു വര്‍ഷമായി കേരളം എല്ലാ തയാറെടുപ്പുകളും നടത്തിയിട്ടും വികസന നീട്ടിക്കൊണ്ടു പോകുന്നതിന് ന്യായീകരണമില്ല. ഇതു കേന്ദ്രത്തിന്റെ ബോധപൂര്‍വമായ വീഴ്ചയായി കണക്കാക്കേണ്ടിവരും. ദേശീയപാത വികസനത്തിനായി 68.2 ശതമാനം ഭൂമി ഏറ്റെടുത്തിട്ടുണ്ട്. ഇതില്‍ 9.14 ശതമാനം നാഷനല്‍ ഹൈവേ അതോറിറ്റിക്ക് കൈമാറി. ഭൂമി ഏറ്റെടുക്കലിന്റെ രണ്ടാംഘട്ടത്തില്‍ 1,177.62 ഹെക്ടറില്‍ 803.21 ഹെക്ടറിന് 3എ നോട്ടിഫിക്കേഷന്‍ പുറപ്പെടുവിച്ചു. ദേശീയപാത വികസനം മുന്നോട്ടു കൊണ്ടുപോകുന്നതിന് നാഷനല്‍ ഹൈവേ അതോറിറ്റിക്ക് നിലവില്‍ തടസങ്ങളൊന്നുമില്ലെന്നാണ് കരുതുന്നത്. സംസ്ഥാന സര്‍ക്കാര്‍ സ്വീകരിച്ച അനുയോജ്യ സമീപനം എന്‍.എച്ച് അതോറിറ്റിയില്‍ നിന്നുമുണ്ടായാല്‍ വികസനം പൂര്‍ത്തിയാക്കാന്‍ കഴിയും. എന്നാല്‍ പലപ്പോഴും നാഷനല്‍ ഹൈവേ അതോറിറ്റിയുടെ നിലപാട് അനുകൂലമായ രീതിയിലല്ലെന്നും മന്ത്രി പറഞ്ഞു.