തിരുവനന്തപുരം: ഇന്ധനവിലയില്‍ സെസ് ഏര്‍പ്പെടുത്തി കേരളം പോലുള്ള ഉപഭോക്തൃ സംസ്ഥാനങ്ങളില്‍ വീണ്ടും വിലക്കയറ്റം സൃഷ്ടിക്കുന്നതാണ് കേന്ദ്ര ബജറ്റെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. കേരളം പൂര്‍ണമായി അവഗണിക്കപ്പെട്ടിരിക്കുകയാണ്. പൊതുമേഖലാ സ്ഥാപനങ്ങള്‍ വിറ്റഴിക്കുന്നത് ഒരു നയമായിതന്നെ തുടരുമെന്നും എയര്‍ ഇന്ത്യ വില്‍ക്കാനുള്ള തീരുമാനം നടപ്പിലാക്കുമെന്നും ധനമന്ത്രി അര്‍ഥശങ്കയ്ക്കിടയില്ലാത്തവിധം വ്യക്തമാക്കിയിരിക്കുയാണെന്ന് അദ്ദേഹം പ്രതികരിച്ചു.
സാധാരണക്കാരായ ആദായനികുതി ദായകര്‍ക്ക് ഒരു ആശ്വാസവും കേന്ദ്ര ബജറ്റിലില്ല. എന്നാല്‍ 400 കോടിവരെ വിറ്റുവരവുള്ള കമ്പനികള്‍ക്ക് കോര്‍പ്പറേറ്റ് നികുതി 30 ശതമാനത്തില്‍നിന്ന് 25 ശതമാനമായി കുറച്ചുകൊണ്ട് കോര്‍പ്പറേറ്റുകളോടുള്ള മോദി സര്‍ക്കാരിന്റെ വിധേയത്വം ഒന്നുകൂടി വ്യക്തമാക്കിയിരിക്കുകയാണ്. തൊഴിലില്ലായ്മക്ക് പരിഹാരം കാണുവാനോ വിദ്യാഭ്യാസ മേഖലയിലോ യുവജനങ്ങളുടെ ക്ഷേമത്തിനോ ഒരു പദ്ധതിപോലും പ്രഖ്യാപിക്കാത്ത കേന്ദ്ര ബജറ്റ് ഇന്ത്യന്‍ ജനതയുടെ ജീവിതഭാരം വര്‍ധിപ്പിക്കാന്‍ മാത്രമേ ഉതകുകയുള്ളൂ എന്നും കാനം പ്രസ്താവനയില്‍ പറഞ്ഞു.