വള്ളുവമ്പ്രം: തോടില്‍ കോഴിയവശിഷ്ടങ്ങള്‍ ഉള്‍പ്പെടെയുള്ള മാലിന്യങ്ങളൊഴുക്കി. കോഴിക്കോട്-പാലക്കാട് ദേശീയ പാതയോരത്തിന് സമീപത്തെ പാടശേഖരത്തിലൂടെ ഒഴുകുന്ന തോടിലാണ് വലിയ അളവില്‍ മാലിന്യങ്ങള്‍ ഒഴുകുന്നത്.
കഴിഞ്ഞ ദിവസങ്ങളില്‍ ചത്ത കോഴി, പ്ലാസ്റ്റിക് കവറുകളില്‍ കെട്ടിപൊതിഞ്ഞ മാലിന്യങ്ങള്‍ എന്നിവയാണ് വിവിധയിടങ്ങളില്‍ ഒഴുകുന്നതായി നാട്ടുകാരുടെ ശ്രദ്ധയില്‍പ്പെട്ടത്. ചില ദിവസങ്ങളില്‍ ഏറെ ദുര്‍ഗന്ധം വമിക്കുന്നതായും പരിസരവാസികള്‍ പറയുന്നു. കടലുണ്ടിപ്പുഴയുടെ പ്രധാന കൈവഴിയായ ഈ വലിയ തോട് പരിസര പ്രദേശത്തുക്കാരുടെ പ്രധാന ജലസ്രോതസാണ്.
വള്ളുവമ്പ്രത്തെ വയലുകളില്‍ നിന്ന് ഉത്ഭവിച്ച് അത്താണിക്കല്‍, പൂക്കോട്ടൂര്‍, മേല്‍മുറി വഴി കിലോമീറ്ററുകള്‍ താണ്ടിയാണ് ഈ തോട് കടലുണ്ടി പുഴയില്‍ പതിക്കുന്നത്. രാത്രിയുടെ മറവിലാണ് അവശിഷ്ടങ്ങള്‍ മറ്റും തോടുകളില്‍ തള്ളുന്നത്. പലയിടത്തും മാലിന്യങ്ങള്‍ കെട്ടിക്കിടക്കുന്നുമുണ്ട്. ഇതുമായി ബന്ധപ്പെട്ട് ചിത്രങ്ങള്‍ സഹിതം ഹെല്‍ത്ത് ഇന്‍സ്‌പെക്ടര്‍ക്ക് നാട്ടുകാര്‍ പരാതി അയച്ചിട്ടുണ്ട്.