റിയാദ്: വൈറ്റ് ഹൗസ് സീനിയർ ഉപദേശകൻ കുഷ്നർ സഊദി, ഖത്തർ സന്ദർശനത്തിന്. ഇരു രാജ്യങ്ങളും സന്ദർശിക്കുന്നതിന് കുഷ്നറും സംഘവും ഈയാഴ്ച തന്നെ എത്തുമെന്ന് വൈറ്റ് ഹൗസ് കേന്ദ്രങ്ങളെ ഉദ്ധരിച്ചു റോയിട്ടേഴ്സ് റിപ്പോർട്ട് ചെയ്തു. ഇറാനിയൻ ആണവ ശാസ്ത്രജ്ഞന്റെ കൊലപാതകത്തിനു ശേഷം മേഖലയിൽ ഉണ്ടായ പിരിമുറുക്കമുണ്ടാക്കതിനിടെയാണ് സന്ദർശനം എന്നത് ശ്രദ്ദേയമാണ്. 

       സഊദിയിലെത്തുന്ന കുഷ്നറും സംഘവും കിരീടവകാശി മുഹമ്മദ്‌ ബിൻ സൽമാൻ രാജകുമാരനുമായി കൂടികാഴ്ച്ച നടത്തുമെന്ന് മുതിർന്ന യുഎസ് അഡ്മിനിസ്ട്രേഷൻ ഓഫീസർ വ്യക്തമാക്കി. സഊദി നിയോം സിറ്റിയിൽ നടക്കുന്ന കൂടിക്കാഴ്ചയിൽ പങ്കെടുക്കാനെത്തുന്ന കുഷ്നറോടൊപ്പം മധ്യേഷ്യൻ അംബാസിഡർ അവി ബെർകോവിത്സ്, യു എസ് ഇന്റർനാഷണൽ ഡവലപ്മെന്റ് ഫിനാൻസ് കോർപറേഷൻ ചീഫ് എക്‌സിക്യുട്ടീവ് ആദം ബോഈഹ്ലർ എന്നിവരും ഉണ്ടാകും.

     ട്രംപ്‌ ഭരണ കൂടം ചുമതല ഒഴിവാകും മുമ്പ് നടത്തുന്ന അവസാന സന്ദർശനമായിരിക്കുമിത്. വെള്ളിയാഴ്ച ഇറാന്റെ ആണവ ശാസ്ത്രജ്ഞൻ മുഹ്സിൻ ഫക്രിസാദേ കൊല്ലപ്പെട്ടതിന് പിന്നാലെ മേഖകലയിൽ വീണ്ടും സംഘർഷ സാധ്യത ഉടലെടുത്തിട്ടുണ്ട്. സംഭവത്തിന്‌ പിന്നിൽ ഇസ്റാഈൽ ആണെന്ന് ആരോപിക്കുന്ന ഇറാൻ, ഇതിനെതിരെ ശക്തമായി പ്രതികരിക്കുമെന്നും മുന്നറിയിപ്പ് നൽകിയിട്ടുണ്ട്.

     നേരത്തെ വൈറ്റ് ഹൗസിൽ വെച്ച് സഊദി-ഖത്തർ പ്രശ്ന പരിഹാരത്തിനായി ശ്രമം നടത്തിയ കുവൈതുമായി കുഷ്നർ ചർച്ച നടത്തിയിരുന്നു. കുവൈത് വിദേശ കാര്യ മന്ത്രി ശൈഖ് അഹ്‌മദ്‌ നാസിർ അൽ മുഹമ്മദ്‌ അൽ സബാഹുമായിട്ടായിരുന്നു കൂടിക്കാഴ്ച. 2017 ൽ സഊദി നേതൃത്വത്തിൽ ഈജിപ്ത്, ബഹ്‌റൈൻ യുഎഇ രാജ്യങ്ങൾ ഏർപ്പെടുത്തിയ ഖത്തർ ഉപരോധം ഒഴിവാക്കാനുള്ള ശ്രമവും അമേരിക്ക ശക്തമാക്കിയിട്ടുണ്ട്.