കോഴിക്കോട്: സംസ്ഥാനത്ത് ഇന്നത്തെ മഴ സാധ്യതയെപ്പറ്റി വിവിധ സര്‍ക്കാര്‍ ഏജന്‍സികള്‍ രണ്ടു തട്ടില്‍. വയനാട്ടിലും ഇടുക്കിയിലും കനത്ത മഴയ്ക്ക് സാധ്യതയുണ്ടെന്ന മുന്നറിയിപ്പാണ് സംസ്ഥാന കാലാവസ്ഥാ നിരീക്ഷണ കേന്ദ്രം നല്‍കിയത്. എന്നാല്‍ ഇന്ന് പരക്കെ മഴ പെയ്യുമെന്നാണ് കേന്ദ്ര കാലാവസ്ഥാ വകുപ്പ് പറയുന്നത്.
സംസ്ഥാനത്ത് മഴയുടെ ശക്തികുറയുന്നതായാണ് സംസ്ഥാന കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തല്‍. ഇന്ന് വയനാട്, ഇടുക്കി ജില്ലകളില്‍ മാത്രമാണ് കനത്തമഴ സാധ്യതയെ തുടര്‍ന്ന് യെല്ലോ അലര്‍ട്ട് പ്രഖ്യാപിച്ചത്. വയനാട്ടില്‍ ഇന്നു കൂടിയാണ് കനത്തമഴക്ക് സാധ്യത. എന്നാല്‍ ഇടുക്കിയില്‍ നാളെയും യെല്ലോ അലര്‍ട്ട് പ്രഖ്യാപിച്ചു. മറ്റു ജില്ലകളിലെല്ലാം ഒറ്റപ്പെട്ട ഇടത്തരം മഴക്കുള്ള സാധ്യത അടുത്തമാസം ഒന്നുവരെ തുടരുമെന്നും സംസ്ഥാന കാലാവസ്ഥാ നിരീക്ഷണ കേന്ദ്രം പറയുന്നു.
എന്നാല്‍ കേന്ദ്ര കാലാവസ്ഥാ വകുപ്പിന്റെ ബുള്ളറ്റിന്‍ അനുസരിച്ച് ഈ മാസം 30 വരെ സംസ്ഥാനത്ത് യെല്ലോ അലര്‍ട്ടുണ്ട്. ഇന്ന് പരക്കെ മഴയുണ്ടാകുമെന്നും നാളെ മുതല്‍ മിക്കയിടങ്ങളിലും മഴയുണ്ടാകുമെന്നുമാണ് ഇന്നലെ വൈകിട്ടുള്ള ബുള്ളറ്റിനിലുള്ളത്. അതിനിടെ മധ്യ - തെക്കന്‍ കേരളത്തില്‍ ഇന്നലെ വ്യാപകമായി മഴ ലഭിച്ചിരുന്നു.
സംസ്ഥാനത്ത് ഇന്നു രാത്രി 11.30 വരെ കടല്‍പ്രക്ഷുബ്ധമാകുമെന്ന് കേന്ദ്ര സമുദ്രഗവേഷണ കേന്ദ്രം അറിയിച്ചു. തിരമാലകള്‍ക്ക് ഒന്ന് മുതല്‍ 1.5 മീറ്റര്‍ വരെ ഉയരമുണ്ടാകും. വേലിയേറ്റ സമയത്ത് താഴ്ന്ന പ്രദേശമായ തിരുവനന്തപുരം, കൊല്ലം, ആലപ്പുഴ, കൊച്ചി, പൊന്നാനി, കോഴിക്കോട്, കണ്ണൂര്‍, കാസര്‍കോട് എന്നിവിടങ്ങളിലെ താഴ്ന്ന പ്രദേശങ്ങളിലേക്ക് കടല്‍ കയറാന്‍ സാധ്യതയുണ്ടെന്നും അറിയിപ്പില്‍ പറയുന്നു.
കൂട്ടിയിടിച്ച് തകരാതിരിക്കാന്‍ സുരക്ഷിത അകലം പാലിച്ച് നങ്കൂരമിടണം. ബോട്ടുകള്‍ കരയിലേക്ക് അടുപ്പിക്കുമ്പോഴും കടലിലേക്ക് ഇറക്കുമ്പോഴും ശ്രദ്ധിക്കണം.