കൊച്ചി: കേരളത്തിന്റെ ടൂറിസം വിപണന സാധ്യതകള്‍ വര്‍ധിപ്പിക്കുമെന്ന് മുഖ്യമന്ത്രി പിണറായി വിജയന്‍. കേരള ട്രാവല്‍ മാര്‍ട്ട്(കെ.ടി.എം) ഉദ്ഘാടനം ചെയ്യുകയായിരുന്നു അദ്ദേഹം. പ്രളയക്കെടുതിക്ക് ശേഷം കൂടുതല്‍ കരുത്തോടെ വിനോദസഞ്ചാരികളെ വരവേല്‍ക്കാന്‍ സംസ്ഥാനം ഒരുങ്ങിയിരിക്കയാണ്. കേരള ടൂറിസം ആകര്‍ഷണീയമാണെന്ന് ട്രാവല്‍ മാര്‍ട്ടിലൂടെ നാം തെളിയിക്കുന്നു. 1,500 ബയര്‍മാരാണ് കേരളത്തില്‍ എത്തിയത്. ആദ്യമായാണ് ഇത്രയധികം പേര്‍ എത്തുന്നത്. കേരള ടൂറിസത്തിലുള്ള വിശ്വാസമാണ് ഇത് തെളിയിക്കുന്നത്. വാണിജ്യ കൂടിക്കാഴ്ചകള്‍ക്കൊപ്പം ടൂറിസം മേഖലകളെ കുറിച്ചുള്ള ചര്‍ച്ചകളും നടക്കും. ഇവിടെ ഉരുത്തിരിയുന്ന നിര്‍ദേശങ്ങള്‍ ഭാവി വികസനത്തിന് പ്രയോജനപ്പെടുത്തും.
ഉത്തരവാദിത്ത ടൂറിസം വഴി കേരള ടൂറിസത്തെ ആഗോള ടൂറിസം ഭൂപടത്തില്‍ എത്തിക്കാനാണ് സര്‍ക്കാര്‍ ലക്ഷ്യമിടുന്നത്. ഉത്തരവാദിത്ത ടൂറിസത്തിന്റെ ഭാഗമായി ഒരു പ്രദേശം മാറുമ്പോള്‍ അവിടുത്തെ എല്ലാ വിഭാഗം ജനങ്ങള്‍ക്കും നേട്ടമുണ്ടാകുമെന്നും പിണറായി വിജയന്‍ പറഞ്ഞു. ടൂറിസം മന്ത്രി കടകംപള്ളി സുരേന്ദ്രന്‍ അധ്യക്ഷനായി. കേന്ദ്ര മന്ത്രി അല്‍ഫോണ്‍സ് കണ്ണന്താനം, കെ.വി തോമസ് എം.പി, എം.എല്‍.എ മാരായ ഹൈബി ഈഡന്‍ , തോമസ് ചാണ്ടി , പത്മശ്രീ എം.എ യൂസുഫലി, ടൂറിസം സെക്രട്ടറി റാണി ജോര്‍ജ്, ടൂറിസം ഡയരക്ടര്‍ ബാലകിരണ്‍, കെ.ടി.എം പ്രസിഡന്റ് ബേബി മാത്യു സംസാരിച്ചു. 30നാണ് കെ.ടി.എം അവസാനിക്കുന്നത്.