മുഹമ്മ: വിദ്യാര്‍ത്ഥികളെയും കൗമാരക്കാരെയും കേന്ദ്രീകരിച്ചുള്ള കഞ്ചാവ് മയക്കുമരുന്ന് വില്‍പ്പന വ്യാപകമാകുന്നു. ചേര്‍ത്തല, ആലപ്പുഴ ഭാഗങ്ങളിലാണ് വിദ്യാര്‍ത്ഥികളെ കഞ്ചാവ് മയക്കുമരുന്ന് വില്‍പ്പനയ്ക്ക് ഉപയോഗിക്കുന്നത്.
വിദ്യാര്‍ത്ഥികള്‍ക്ക് കഞ്ചാവ് എത്തിക്കുന്നവരെക്കുറിച്ച് കൃത്യമായ വിവരം ലഭിക്കാത്തതിനാല്‍ എക്‌സൈസ് വകുപ്പ് പലപ്പോഴും നിസ്സഹായാവസ്ഥയിലാണ്.സമീപകാലത്ത് കഞ്ചാവ് വില്‍പ്പനയുമായി ബന്ധപ്പെട്ട് എക്‌സൈസ് പിടിയിലായവരിലധികവും വിദ്യാര്‍ത്ഥികളും കൗമാരപ്രായക്കാരുമാണ്. വിദ്യാര്‍ത്ഥികള്‍ക്ക് കഞ്ചാവ് എത്തിക്കുന്നവരിലേയ്ക്ക് അന്വേഷണം എത്താത്തതാണ് ഇതിന് പ്രധാന കാരണം. സ്‌കൂളുകള്‍ അടക്കമുള്ള വിദ്യാഭ്യാസ സ്ഥാപനങ്ങള്‍ സല്‍പ്പേര് ഭയം മൂലം കൃത്യമായ വിവരങ്ങള്‍ നല്‍കാത്തതും മറച്ചു വയ്ക്കുന്നതുമാണ് എക്‌സൈസിന് തിരിച്ചടിയാകുന്നത്.
ഭൂരിപക്ഷം സ്‌കൂളുകളും ഇത്തരത്തില്‍ വിവരം മറച്ചുവയ്ക്കുകയാണെന്ന് എക്‌സൈസ് അധികൃതര്‍ പറയുന്നു. വിദ്യാര്‍ത്ഥികള്‍ക്ക് കഞ്ചാവും മയക്കുമരുന്നും നല്‍കുന്ന കണ്ണികളെ കണ്ടെത്താന്‍ സ്‌കൂള്‍ അധികൃതരുടെ സഹായം ഉറപ്പാക്കാന്‍ ബോധവല്‍ക്കരണമടക്കമുള്ള പ്രവര്‍ത്തനങ്ങള്‍ എക്‌സൈസ് നടത്തുന്നുണ്ട്. നിയമത്തിലെ പോരായ്മയും കഞ്ചാവ് മാഫിയയ്ക്ക് വളമാകുന്നുണ്ട്.2001 വരെ ഒരു ഗ്രാം കഞ്ചാവ് കയ്യില്‍ സൂക്ഷിച്ചാല്‍ 10 വര്‍ഷം തടവ് ശിക്ഷ ലഭിക്കുമായിരുന്നു.
എന്നാല്‍ കേന്ദ്ര നിയമം ഭേദഗതി ചെയ്തതോടെ ശിക്ഷ ലഘൂകരിക്കപ്പെട്ടു. ഒരു കിലോഗ്രാം വരെ കഞ്ചാവ് സൂക്ഷിക്കുന്നവര്‍ക്ക് ജാമ്യം ലഭിക്കുമെന്ന് മാത്രമല്ല ആറ് മാസം മാത്രം ശിക്ഷ ലഭിക്കുന്ന കുറ്റമായി. നിയമത്തില്‍ ഭേദഗതി ആവശ്യപ്പെട്ട് സംസ്ഥാന സര്‍ക്കാര്‍ കേന്ദ്ര സര്‍ക്കാരിന് നിരവധി തവണ ശുപാര്‍ശ നല്‍കിയിട്ടും ഫലമുണ്ടായില്ല.

.