കരുനാഗപ്പള്ളി: കെ.എസ്.ആര്‍.ടി.സി.ഡിപ്പോയിലേക്ക് ഐ.ഒ.സിയില്‍ നിന്നും കൊണ്ട് വന്ന ഡീസലില്‍ മായം കലര്‍ന്നതായി ആരോപണം. കഴിഞ്ഞദിവസം രാത്രി 10.30ന് ടാങ്കര്‍ ലോറിയില്‍ ഡിപ്പോയിലെ പമ്പിലേക്ക് ഇറക്കാന്‍ കൊണ്ട് വന്നതായിരുന്നു. പതിനായിരം ലിറ്റര്‍ വീതമുള്ള മൂന്ന് അറകളിലായി വന്ന ടാങ്കര്‍ലോറിയിലെ രണ്ട് അറകളിലും വെള്ളവും മണ്ണും നിറഞ്ഞതും കറുപ്പും കടുംമഞ്ഞ നിറത്തോട് കൂടിയതുമായിരുന്നു എന്ന് പറയപ്പെടുന്നു. പരിശോധനയില്‍ സംശയം തോന്നിയതിനെ തുടര്‍ന്ന് ചാര്‍ജ്ജ്മാന്‍ വിവരം ഡിപ്പോ എഞ്ചിനിയറെ അറിയിക്കുകയായിരുന്നു. ഇതിനെ തുടര്‍ന്ന് ഡീസല്‍ ഇറക്കാതെ ടാങ്കര്‍ ലോറി മാറ്റിയിട്ട് പരിശോധന കഴിഞ്ഞ് രാവിലെ ഇറക്കാമെന്ന് നിര്‍ദ്ദേശിക്കുകയായിരുന്നു.
എന്നാല്‍ ചില ഉന്നത ഇടപെടലുകളെ തുടര്‍ന്ന് രാവിലെ ഉദ്യോഗസ്ഥര്‍ ഡിപ്പോയിലേ പമ്പിലേക്ക് ഡീസല്‍ ഇറക്കി. ഡിപ്പോയിലേ ജീവനക്കാരും മെക്കാനിക്ക് വിഭാഗവും സംഭവത്തില്‍ പ്രതിഷേധിച്ചു. ഇത്തരത്തിലുള്ള ഡീസല്‍ വാഹനങ്ങളില്‍ അടിക്കുന്നതിനെ തുടര്‍ന്നാണ് ബസുകള്‍ വഴിയില്‍ യാത്ര മുടക്കുന്നതെന്നും പമ്പിലെ ടാങ്കുകള്‍ പെട്ടെന്ന് പൊടിയുന്നതെന്നും ജീവനക്കാര്‍ പറയുന്നു.