വണ്ടൂര്‍: ബ്ലോക്ക് പഞ്ചായത്ത് വാര്‍ഷിക പദ്ധതി അംഗീകരിച്ചത് മാനദണ്ഡങ്ങള്‍  പാലിക്കാതെയെന്ന് ആരോപണം. വികസന സെമിനാര്‍ ഉള്‍പ്പെടെയുള്ള  നടപടി ക്രമങ്ങള്‍ പൂര്‍ത്തിയാക്കാതെയും നീതിയുക്തമല്ലാതെയുമാണ് പദ്ധതി തയാറാക്കിയതെന്നാരോപിച്ച് പ്രതിപക്ഷം രംഗത്തെത്തി.
ഇത് സംബന്ധിച്ച് ഉന്നത തലത്തില്‍ പരാതിയുമായി പോകുമെന്നും പ്രതിപക്ഷ അംഗങ്ങള്‍ വാര്‍ത്താ സമ്മേളനത്തില്‍ പറഞ്ഞു. ബ്ലോക്ക് പഞ്ചായത്തില്‍ നടന്ന അരക്കോടി രൂപയുടെ അഴിമതി പുറത്തായതിന്റെ രാഷ്ട്രീയ വിരോധം തീര്‍ക്കാനാണ് പ്രതിപക്ഷ  അംഗങ്ങളുടെ ഡിവിഷനുകളിലേക്ക് തുക അനുവദിക്കാതിരുന്നതെന്നും സി.പി.എം അംഗങ്ങള്‍ ആരോപിച്ചു.  ബ്ലോക്ക് സാക്ഷരതാ മിഷന് കാര്യാലയം നിര്‍മിക്കുമെന്ന് മൂന്ന് തവണ വാഗ്ദാനം നല്‍കിയ ഭരണ നേതൃത്വം ഇതിന് ഒരു രൂപ പോലും മാറ്റിവയ്ക്കാതെ ബ്ലോക്ക് കാര്യാലയം ശീതീകരിക്കാനും ലാപ്‌ടോപ്പുകള്‍ വാങ്ങാനും ആറര ലക്ഷം രൂപ നീക്കിവച്ചത് അപഹാസ്യമാണ്.
തകര്‍ച്ചാ ഭീഷണി നേരിടുന്ന വെള്ളാമ്പുറം അങ്കണവാടിക്ക് തുക നീക്കി വെക്കാതെ മറ്റൊരു അങ്കണവാടിക്ക് 10 ലക്ഷം രൂപ വകയിരുത്തിയതും ദുരുദ്യേശത്തോടെയാണ്. ഇതെല്ലാം ഉള്‍പ്പെടുത്തി ജില്ലാ കലക്ടര്‍, ജില്ലാ ആസൂത്രണ സമിതി, വകുപ്പ് മന്ത്രി, ധനമന്ത്രി, മുഖ്യമന്ത്രി എന്നിവര്‍ക്ക് പരാതി നല്‍കാനാണ് തീരുമാനമെന്ന് വാര്‍ത്താ സമ്മേളനത്തില്‍ പങ്കെടുത്ത പ്രതിപക്ഷ അംഗങ്ങളായ കാപ്പില്‍ ജോയി, അഡ്വ.അനില്‍ നിരവില്‍, അഡ്വ.ഷീനാ രാജന്‍, പി.ശശികുമാര്‍, ഇ.രാധാമണി എന്നിവര്‍ പറഞ്ഞു.