തരുവണ: കരിങ്ങാരി ഗവ. യു.പി സ്‌കൂളിലെ പച്ചക്കറി കൃഷി വെറും വിളവെടുപ്പിന് മാത്രമല്ല.
മണ്ണറിഞ്ഞ് വിത്തിറക്കി മുളച്ച് മൂത്ത് വിളവെടുക്കുന്നത് വരെ വിദ്യാര്‍ഥികള്‍ക്ക് പഠനാനുഭവം കൂടിയാണ്. ഒന്ന് മുതല്‍ ഏഴ് വരെ എല്ലാ ക്ലാസിലെയും പാഠഭാഗങ്ങളുമായി ബന്ധപ്പെടുത്തി അധ്യാപകര്‍ കൃഷിയും അധ്യാപനവും ഒരുമിച്ചു കൊണ്ട് പോകുന്നു. ഈ വര്‍ഷത്തെ കൃഷിക്ക് തടമൊരുക്കും മുമ്പ് ഏഴാം ക്ലാസ് വിദ്യാര്‍ഥികള്‍ മണ്ണിന്റെ അസിഡിറ്റി ശാസ്ത്രീയമായി പരിശോധിച്ചു. ശാസ്ത്രാധ്യാപികമാരായ ശ്രീലത ടീച്ചര്‍, സിന്ധു ടീച്ചര്‍ എന്നിവര്‍ വിദ്യാര്‍ഥികള്‍ക്ക് നിര്‍ദേശങ്ങള്‍ നല്‍കി. പരിശോധനയുടെ അടിസ്ഥാനത്തില്‍ മണ്ണില്‍ അസിഡിറ്റി കൂടുതലാണെന്ന് കണ്ടെത്തുകയുണ്ടായി. ഉഴുതുമറിച്ച കൃഷിയിടത്തില്‍ കുമ്മായം വിതറി തടമൊരുക്കാന്‍ വിദ്യാര്‍ഥികള്‍ക്കൊപ്പം അധ്യാപകരും രക്ഷിതാക്കളും പങ്കു ചേര്‍ന്നു. പി.ടി.എ പ്രസിഡന്റ് എ. മുരളീധരന്‍ നടീല്‍ ഉദ്ഘാടനം നിര്‍വഹിച്ചു.