ന്യൂജഴ്സി: പച്ചപ്പുൽമൈതാനങ്ങളിൽ ചിലപ്പോൾ ചരിത്രം കവിതയെഴുതാറുണ്ട്; ചിലപ്പോൾ അത് പ്രതികാരത്തിന്റെ ചോരയൊപ്പിയ കഥകളാകാറുണ്ട്. 24 വർഷങ്ങൾക്കപ്പുറം സിയോളിന്റെ ആകാശത്ത് വീണുടഞ്ഞ ഫ്രഞ്ച് സ്വപ്നങ്ങളുടെ കഷ്ണങ്ങൾ പെറുക്കിയെടുക്കാൻ കിലിയൻ എംബാപ്പെയും കൂട്ടരും ഇന്ന് മെറ്റ്ലൈഫ് സ്റ്റേഡിയത്തിൽ ബൂട്ട് കെട്ടുകയാണ്. കാൽപന്ത് കളിയുടെ ചരിത്ര പുസ്തകത്തിലെ ഏറ്റവും സുന്ദരമായ അട്ടിമറിയുടെ ഓർമ്മകൾ ഇരമ്പുന്ന മണ്ണിൽ, ഫ്രാൻസും സെനഗലും വീണ്ടുമൊരു കാവ്യയുദ്ധത്തിന് നേർക്കുനേർ നിൽക്കുന്നു.

പച്ചപ്പുല്ലിലെ ആഫ്രിക്കൻ വസന്തം; സിദാന്റെ നിഴലും ദിയോപിന്റെ പ്രണയനൃത്തവും

അത് 2002 മെയ്മാസക്കുളിരിലായിരുന്നു. ലോകകിരീടത്തിന്റെ ആത്മവിശ്വാസവുമായി വന്ന ഫ്രഞ്ച് രാജാക്കന്മാർക്ക് മുന്നിലേക്ക്, കറുത്ത ഭൂഖണ്ഡത്തിന്റെ വന്യമായ താളവുമായി ഒരു കൂട്ടം സെനഗൽ ചെറുപ്പക്കാർ നടന്നുകയറി. കാൽമുട്ടിലെ പരുക്ക് സിനദിൻ സിദാന്റെ മാന്ത്രികക്കാൽപ്പാടുകളെ ഗാലറിയിലിരുത്തിയ ആ കറുത്ത വെള്ളിയാഴ്ച, സിയോളിന്റെ പുൽത്തകിടിയിൽ ഒരു വിപ്ലവം പിറന്നു. പാപ്പ ബൗബ ദിയോപ് എന്ന കറുത്തമുത്ത് ഫ്രഞ്ച് കോട്ടയിലേക്ക് ആഴ്ന്നിറക്കിയ ആ ഒരൊറ്റ ഗോൾ... അതിനുശേഷം കോർണർ ഫ്‌ലാഗിന് ചുറ്റും ജേഴ്‌സി ഊരിയിട്ട് അവർ നൃത്തം ചെയ്തപ്പോൾ, അത് വെറുമൊരു ഗോൾ ആഘോഷമായിരുന്നില്ല. മറിച്ച്, ലോക ഫുട്‌ബോളിലെ വരേണ്യവർഗ്ഗത്തിന് നേരെ ആഫ്രിക്കൻ കരുത്ത് പ്രഖ്യാപിച്ച സ്വാതന്ത്ര്യപ്രഖ്യാപനമായിരുന്നു.

അന്ന് തിയറി ഹെൻറിയുടെ ഷോട്ടുകൾ പോസ്റ്റിൽ തട്ടിത്തെറിച്ചപ്പോൾ, ബെഞ്ചിലിരുന്ന് കണ്ണീർ വാർത്ത സിദാന്റെ മുഖം ലോകകപ്പ് ചരിത്രത്തിലെ ഏറ്റവും വലിയ നോവായി മാറി. ആ ഒരൊറ്റ തോൽവിയിൽ ഫ്രാൻസിന്റെ കിരീടമോഹങ്ങൾ അന്ന് ഗ്രൂപ്പ് ഘട്ടത്തിൽത്തന്നെ കരിഞ്ഞുപോവുകയായിരുന്നു.

ALSO READ: ലോകകപ്പിലെ ഏറ്റവും കൂടുതൽ പീഡിപ്പിക്കപ്പെടുന്ന ടീം ഞങ്ങളാണ്'; യു.എസ് വിടാൻ ഉത്തരവ് ലഭിച്ചതിന് പിന്നാലെ ഇറാൻ കോച്ച്

കടൽ കടന്നെത്തുന്ന പ്രതികാരക്കാറ്റ്; എംബാപ്പെയുടെ വേഗതയും മാനെയുടെ പ്രത്യാശയും

ഇന്ന് കാലം 24  ആണ്ടുകൾക്കപ്പുറം മറ്റൊരു ലോകകപ്പിന്റെ വേദിയൊരുക്കുമ്പോൾ, ഫ്രാൻസിന്റെ കയ്യിൽ പഴയ സിദാന്റെ കണ്ണീരിന്റെ ഓർമ്മകളുണ്ട്. കിലിയൻ എംബാപ്പെയെന്ന കൊടുങ്കാറ്റിന്റെ വേഗതയിൽ അവർ അന്ന് നഷ്ടപ്പെട്ട സിംഹാസനം തിരിച്ചുപിടിക്കാൻ വെമ്പുന്നു. എന്നാൽ, സാദിയോ മാനെയുടെ പ്രത്യാശയും കാലിഡൂ കൂലിബാലിയുടെ പ്രതിരോധക്കോട്ടയുമായി സെനഗൽ ഇന്നും ഒട്ടും ഭയമില്ലാതെയാണ് നിൽക്കുന്നത്.

ഇതൊരു വെറും മത്സരമല്ല; സിയോളിൽ നിർത്തിവച്ച ആ പഴയ കാവ്യത്തിന്റെ തുടർച്ചയാണ്. ന്യൂജഴ്സിയിലെ ആകാശത്ത് ഇന്ന് രാത്രി റഫറിയുടെ വിസിൽ മുഴങ്ങുമ്പോൾ, ഒന്നുകിൽ പഴയ ചരിത്രം കവിതയായി ആവർത്തിക്കും, അല്ലെങ്കിൽ ഫ്രഞ്ച് പട തങ്ങളുടെ കറുത്ത ഭൂതകാലത്തെ വെണ്ണീറാക്കി പുതിയൊരു ഇതിഹാസം രചിക്കും!