HOME
DETAILS

അങ്കപ്പോരില്‍ സപ്തഭാഷാ സംഗമഭൂമി

  
backup
December 13 2020 | 04:12 AM

%e0%b4%85%e0%b4%99%e0%b5%8d%e0%b4%95%e0%b4%aa%e0%b5%8d%e0%b4%aa%e0%b5%8b%e0%b4%b0%e0%b4%bf%e0%b4%b2%e0%b5%8d%e2%80%8d-%e0%b4%b8%e0%b4%aa%e0%b5%8d%e0%b4%a4%e0%b4%ad%e0%b4%be%e0%b4%b7%e0%b4%be-%e0%b4%b8


കാസര്‍കോട്: പരസ്യപ്രചാരണവും കൊട്ടിയിറങ്ങിയപ്പോള്‍ കാസര്‍കോട് തദ്ദേശ ആധിപത്യത്തിന് മുന്നണികള്‍ തമ്മില്‍ നടത്തിയത് കടുത്ത പോരാട്ടം.സി.പി.എമ്മിന്റെ കുത്തക സീറ്റുകളില്‍ വിള്ളലുണ്ടാക്കാനും കാസര്‍കോട് നഗരസഭയില്‍ ഭരണം പിടിച്ചെടുക്കാനുള്ള ബി.ജെ.പിയുടെ പോരാട്ടത്തെ പ്രതിരോധിക്കാനുമുള്ള പടയോട്ടത്തിലാണ് യു.ഡി.എഫ്. ജില്ലാ പഞ്ചായത്ത്, കാസര്‍കോട്, കാഞ്ഞങ്ങാട്, നീലേശ്വരം നഗരസഭകള്‍, മഞ്ചേശ്വരം, കാസര്‍കോട്, കാറഡുക്ക, കാഞ്ഞങ്ങാട്, നീലേശ്വരം, പരപ്പ ബ്ലോക്ക് പഞ്ചായത്ത് എന്നിവിടങ്ങളിലേക്കുള്ള മത്സരം ചൂടേറിയതാണ്. പ്രചാരണത്തിന്റെ അവസാന ദിവസങ്ങളില്‍ യു.ഡി.എഫിന്റെ പ്രമുഖ നേതാക്കള്‍ ജില്ലയിലെത്തിയെങ്കിലും എല്‍.ഡി.എഫിന്റെ സംസ്ഥാന നേതാക്കള്‍ പ്രചാരണ രംഗത്തിറങ്ങിയത് അപൂര്‍വമായി മാത്രമായിരുന്നു.
സര്‍ക്കാരിന്റെ അഴിമതി കഥകളും സ്വര്‍ണക്കടത്ത് കേസും ഉയര്‍ത്തിക്കാട്ടിയ യു.ഡി.എഫിന്റെ പ്രധാന പ്രചാരണ ആയുധത്തിലൊന്ന് പെരിയ ഇരട്ടക്കൊലപാതക കേസായിരുന്നു. ഇത് സി.പി.എമ്മിനെ കടുത്ത പ്രതിരോധത്തിലുമാക്കി.
ഒന്നോ രണ്ടോ സീറ്റിന്റെ വ്യത്യാസത്തില്‍ മുന്നണികള്‍ ഭരണത്തിലെത്തുന്ന ജില്ലാ പഞ്ചായത്ത് ഇത്തവണ പിടിച്ചെടുക്കാന്‍ എല്‍.ഡി.എഫ് കടുത്ത പോരാട്ടം നടത്തുമ്പോള്‍ ചില സിറ്റിങ് സീറ്റുകളില്‍ ഉള്‍പ്പെടെ പാര്‍ട്ടി കടുത്ത വെല്ലുവിളി നേരിടുന്നുണ്ട്. ബേഡകം, പെരിയ ഡിവിഷനുകളില്‍ അട്ടിമറി വിജയം ഉണ്ടാകുമെന്ന് യു.ഡി.എഫ് കണക്കുകൂട്ടുന്നുണ്ട്. നീലേശ്വരം, കാഞ്ഞങ്ങാട് നഗരസഭകളില്‍ ഇടത്, വലതു മുന്നണികള്‍ തമ്മിലുള്ള അങ്കം കടുത്തതാണ്.
കര്‍ണാടകയോടു ചേര്‍ന്നുള്ള മധൂര്‍ പഞ്ചായത്തില്‍ ബി.ജെ.പിയാണ് ഭരണത്തില്‍. മീഞ്ച, വോര്‍ക്കാടി, എന്‍മകജെ പഞ്ചായത്തുകളിലും മഞ്ചേശ്വരം ബ്ലോക്ക് പഞ്ചായത്തിലും രണ്ടാം സ്ഥാനത്താണ്.
അതിര്‍ത്തി മേഖലകളിലെ പഞ്ചായത്തുകള്‍ കൈവിടാതിരിക്കാനും പിടിച്ചെടുക്കാനും യു.ഡി.എഫ് തന്ത്രങ്ങള്‍ മെനയുമ്പോള്‍ ബി.ജെ.പിയും നേരങ്കത്തില്‍ തന്നെയാണ്. കേന്ദ്ര സര്‍ക്കാരിന്റെ പുതിയ കാര്‍ഷിക നയവും രാജ്യ തലസ്ഥാനത്തു കര്‍ഷകര്‍ നടത്തുന്ന സമരവും തങ്ങള്‍ക്കു കൂടുതല്‍ ഗുണകരമാകുമെന്ന പ്രതീക്ഷയിലാണ് ഇടത്, വലത് മുന്നണികള്‍.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."