ആലപ്പുഴ: മകളെ മതം മാറ്റി നിര്‍ബന്ധിച്ച് വിവാഹം കഴിപ്പിച്ചെന്ന പിതാവിന്റെ പരാതിയില്‍ കഴിഞ്ഞ ദിവസം കേരള ഹൈക്കോടതി ഡിവിഷന്‍ ബഞ്ച് പുറപ്പെടുവിച്ച വിധി നിയമ പരിരക്ഷയില്ലാത്തതെന്ന് പ്രമുഖ അഭിഭാഷകനും നിയമവിദഗ്ധനുമായ അഡ്വ. എ.മുഹമ്മദ്. സുപ്രഭാതത്തിന് നല്‍കിയ പ്രത്യേക അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
വിധിക്കെതിരേ സുപ്രിം കോടതിയെ സമീപിക്കേണ്ടിയിരിക്കുന്നു. ശരീഅത്ത് നിയമപ്രകാരം വ്യക്തികള്‍ മറ്റ് മദ്ഹബുകാരാണെന്ന് അവകാശപ്പെടാത്തിടത്തോളം ഇന്ത്യയിലെ മുസ്‌ലിംകള്‍ക്ക് ഹനഫി മദ്ഹബ് ആണ് ബാധകം. ഇതുപ്രകാരം പ്രായപൂര്‍ത്തിയായ ഏതൊരു ആണിനും പെണ്ണിനും പരസ്പര ധാരണയുടെ അടിസ്ഥാനത്തില്‍ വിവാഹം കഴിക്കാം. ഇതില്‍ ആര്‍ക്കും ഇടപെടാന്‍ നിയമം അനുവദിക്കുന്നില്ല. പ്രായപൂര്‍ത്തിയാകാത്തവരാണെങ്കില്‍ ശൈശവ വിവാഹ നിരോധന നിയമപ്രകാരം ശിക്ഷിക്കാം.
എന്നാല്‍ വിവാഹം അസാധുവാക്കാന്‍ കഴിയില്ല. താന്‍ സ്വന്തം ഇഷ്ടപ്രകാരം വിവാഹം കഴിച്ചതാണെന്ന് നേരത്തെ പെണ്‍കുട്ടി കോടതിയെ അറിയിച്ചിരുന്നു. മറ്റ് തടസങ്ങളില്ലാത്ത സാഹചര്യത്തില്‍ വിവാഹം അസാധുവാക്കിയ കോടതി നടപടി നിയമത്തിന് നിരക്കുന്നതല്ല. പിതാവിന്റെ പരാതിയെ തുടര്‍ന്ന് ഇക്കാര്യത്തില്‍ സുതാര്യത വരുത്താനാണ് പെണ്‍കുട്ടിയെ കോടതി വിളിപ്പിച്ചത്.
വൈക്കം സ്വദേശിയായ സേലം ഹോമിയോ കോളജ് വിദ്യാര്‍ഥിനി അഖിലയാണ് ഇസ്‌ലാം സ്വീകരിച്ച് വിവാഹം കഴിച്ചത്. പിതാവ് അശോകനാണ് കേസുമായി കോടതിയെ സമീപിച്ചത്. തന്റെ മകളെ മതം മാറ്റി തീവ്രവാദ പ്രവര്‍ത്തിനായി സിറിയിലേക്ക് കൊണ്ടുപോകുമെന്ന പിതാവ് അശോകന്റെ വാദത്തെ അടിസ്ഥാനപ്പെടുത്തിയാണ് ഇന്നലെ കോടതി വിവാഹം അസാധുവാക്കിയത്.
വിവാഹം രജിസ്റ്റര്‍ ചെയ്ത് നല്‍കരുതെന്ന നിര്‍ദേശവും പഞ്ചായത്ത് സെക്രട്ടറിക്ക് നല്‍കിയിട്ടുണ്ട്. നിയമവിധേയമല്ലാത്ത കീഴ്‌കോടതിയുടെ ഏത് വിധിയും സുപ്രിംകോടതിയില്‍ ചോദ്യം ചെയ്യാന്‍ അനുവദിക്കുന്നുണ്ടെന്നും അഡ്വ. മുഹമ്മദ് പറഞ്ഞു.

'വിധി പൗരാവകാശധ്വംസനം'

കോഴിക്കോട് : ഹാദിയ എന്ന ഇരുപത്തിയഞ്ചുകാരിയായ സ്ത്രീക്ക് ഇഷ്ടപ്പെട്ട മതവിശ്വാസം അനുഷ്ഠിക്കാനും ഇസ്‌ലാമിക നിയമപ്രകാരം വിവാഹം ചെയ്ത പുരുഷന്റെ കൂടെ ജീവിക്കാനുമുള്ള അവസരം നിഷേധിച്ച കേരള ഹൈക്കോടതി വിധി പൗരാവകാശത്തിന്മേലുള്ള കടന്നുകയറ്റമാണെന്ന് എസ്.ഡി.പി.ഐ സംസ്ഥാന ജനറല്‍ സെക്രട്ടറി അജ്മല്‍ ഇസ്മാഈല്‍ പ്രസ്താവിച്ചു. ഇസ്‌ലാമിക നിയമമനുസരിച്ചുള്ള വിവാഹത്തിന് പരിരക്ഷയുള്ള ഇന്ത്യയില്‍ പ്രായ പൂര്‍ത്തിയായ രണ്ട് പേര്‍ക്ക് അത് നിഷേധിച്ച അത്യന്തം ഗൗരവമുള്ള കോടതിവിധിയെക്കുറിച്ച് പ്രതികരിക്കാനും പ്രതിഷേധിക്കാനും മുഴുവന്‍ രാഷ്ട്രീയ പാര്‍ട്ടികള്‍ക്കും ഉത്തരവാദിത്വമുണ്ടെന്നും അദ്ദേഹം പറഞ്ഞു.