തിരുവനന്തപുരം: തിരുവനന്തപുരം യൂനിവേഴ്‌സിറ്റി കോളജില്‍ വിദ്യാര്‍ഥിയെ കുത്തിക്കൊലപ്പെടുത്താന്‍ ശ്രമിച്ച കേസില്‍ ആറ് പ്രതികളെ സസ്‌പെന്‍ഡ് ചെയ്തു. മുഖ്യ   പ്രതികള്‍ ഉള്‍പെടെ ആറ് വിദ്യാര്‍ഥികളെയാണ് കോളജില്‍ നിന്ന് സസ്‌പെന്‍ഡ് ചെയ്തത്. അനിശ്ചിത കാലത്തേക്കാണ് സസ്‌പെന്‍ഷന്‍.

കേസിലെ മുഖ്യപ്രതിയായ ശിവരഞ്ജിത്തിന്റെ വീട്ടില്‍ നിന്ന് ഉത്തരപേപ്പര്‍ കണ്ടെത്തിയ സംഭവത്തില്‍ യൂനിവേഴ്‌സിറ്റി അന്വേഷണം പ്രഖ്യാപിച്ചിട്ടുണ്ട്. പ്രോവൈസ് ചാന്‍സലര്‍ക്കും പരീക്ഷാ കണ്‍ട്രോളര്‍ക്കുമാണ് അന്വേഷണ ചുമതല.

കേരള സര്‍വകലാശാലയുടെ എഴുതാത്ത ഉത്തരക്കടലാസുകളും ഫിസിക്കല്‍ എജ്യുക്കേഷന്‍ ഉദ്യോഗസ്ഥന്റെ പേരിലുള്ള സീലുമാണ് ശിവരഞ്ജിത്തിന്റെ വീട്ടില്‍ നിന്നും കഴിഞ്ഞ ദിവസം പിടിച്ചെടുത്തത്. നാല് കെട്ടോളം ഉത്തരക്കടലാസുകളാണ് കണ്ടെടുത്തത്.