മുന്‍ ഡിജിപി  ആര്‍.ശ്രീലേഖയുടെ പ്രസ്താവനയ്‌ക്കെതിരെ നിയമ നടപടിയുമായി അതിജീവിത. തന്നെ ആക്രമിച്ച കേസില്‍ നടന്‍ ദിലീപിനെതിരെ തെളിവില്ലെന്ന ശ്രീലേഖയുടെ പ്രസ്താവനക്കെതിരെ അതിജീവിത കോടതിയലക്ഷ്യ ഹരജി നല്‍കി. കേസില്‍ ഇന്ന് അന്തിമവാദം ആരംഭിക്കെയായിരുന്നു ശ്രീലേഖയുടെ പരാമര്‍ശം. യുട്ടൂബ് വീഡിയോയിലാണ് അവര്‍ ഇത്തരമൊരു പരാമര്‍ശം നടത്തിയത്. 

എറണാകുളം പ്രിന്‍സിപ്പല്‍ സെഷന്‍സ് കോടതിയിലാണ് അന്തിമവാദം നടക്കുന്നത്. 2018 മാര്‍ച്ച് 8ന് ആരംഭിച്ച വിചാരണയാണ് അന്തിമ ഘട്ടത്തിലേക്ക് കടക്കുന്നത്. വാദം പൂര്‍ത്തിയാക്കാന്‍ രണ്ടാഴ്ച സമയം വേണമെന്ന് പ്രോസിക്യൂഷന്‍ ആവശ്യപ്പെടും. അന്തിമ വാദത്തിന്റെ നടപടികള്‍ ഒരു മാസം കൊണ്ട് പൂര്‍ത്തിയായേക്കും. 

2017 ഫെബ്രുവരി 17 നാണ് കൊച്ചിയില്‍ നടി ആക്രമിക്കപ്പെട്ടത്. നടന്‍ ദിലീപുള്‍പ്പെടെ 12 പ്രതികളായിരുന്നു കേസില്‍ ഉണ്ടായിരുന്നത്. ഇതില്‍ രണ്ട് പേരെ ഒഴിവാക്കുകയും, ഒരാള്‍ മാപ്പുസാക്ഷിയാവുകയും ചെയ്തതോടെ ഒന്‍പത് പേരാണ് അവശേഷിക്കുന്നത്.