കൊടുവള്ളി: അസുഖം മാറ്റാമെന്നു പറഞ്ഞ് വിശ്വസിപ്പിച്ച് വ്യാജസിദ്ധന്‍ ദമ്പതികളില്‍ നിന്ന് തട്ടിയെടുത്ത സ്വര്‍ണാഭരണങ്ങള്‍ വളാഞ്ചേരിയിലെ ജ്വല്ലറിയില്‍നിന്ന് കണ്ടെടുത്തു. നടമ്മല്‍പൊയിലില്‍ വീട് വാടകയ്‌ക്കെടുത്ത് സിദ്ധന്‍ ചമഞ്ഞ് തട്ടിപ്പു നടത്തിയ വളാഞ്ചേരി മൂര്‍ഖനാട് വേരിങ്ങല്‍ വീട്ടില്‍ അബ്ദുല്‍ ഹക്കീമിനെ (45) കഴിഞ്ഞദിവസം പൊലിസ് പിടികൂടിയിരുന്നു. ഇയാളില്‍നിന്നാണ് കൈക്കലാക്കിയ സ്വര്‍ണാഭരണങ്ങള്‍ കൊടുവള്ളി പൊലിസ് കണ്ടെടുത്തത്.
പരാതിക്കാരനായ നടമ്മല്‍പൊയില്‍ സ്വദേശിയുടെയും ഭാര്യയുടെയും അസുഖങ്ങള്‍ മാറ്റിക്കൊടുക്കാന്‍ കഴിവുണ്ടെന്ന് വിശ്വസിപ്പിച്ച് 20 പവന്‍ സ്വര്‍ണാഭരണങ്ങളും അഞ്ചര ലക്ഷം രൂപയും ഹക്കീം തട്ടിയെടുത്തതായാണു കേസ്. എട്ടുമാസം മുന്‍പാണു സംഭവം നടന്നത്. സമാനമായ തട്ടിപ്പുകേസില്‍ ഹക്കീമിനെ നേരത്തെ കുന്ദമംഗലം പൊലിസ് അറസ്റ്റ് ചെയ്തിരുന്നു. റിമാന്‍ഡില്‍ കഴിയുകയായിരുന്ന ഹക്കീമിനെ കൊടുവള്ളി പൊലിസ് തിങ്കളാഴ്ച കസ്റ്റഡിയില്‍ വാങ്ങുകയായിരുന്നു. തുടര്‍ന്നു നടത്തിയ അന്വേഷണത്തില്‍ വളാഞ്ചേരിയിലെ വില്‍പന നടത്തിയ ജ്വല്ലറിയില്‍നിന്ന് സ്വര്‍ണാഭരണങ്ങള്‍ കണ്ടെടുക്കുകയായിരുന്നു.
102 ഗ്രാം സ്വര്‍ണാഭരണങ്ങളാണ് കണ്ടെടുത്തത്. ഹക്കീമിന്റെ മൂര്‍ഖനാടുള്ള വീട്ടുപറമ്പില്‍ ഒളിപ്പിച്ച ഒരു അള്‍ട്ടോ കാറും പൊലിസ് കസ്റ്റഡിയിലെടുത്തിട്ടുണ്ട്. തട്ടിപ്പില്‍ ഹക്കീമിന്റെ ഭാര്യക്കും ഭാര്യയുടെ മാതാവിനും പങ്കുള്ളതായി പൊലിസ് പറഞ്ഞു. പ്രതിയെ ഇന്നു കോടതിയില്‍ ഹാജരാക്കും. കൊടുവള്ളി സി.ഐ ചന്ദ്രമോഹന്‍, എസ്.ഐ കെ. പ്രജീഷ്, എ.എസ്.ഐമാരായ രഘുനാഥ്, വിജയകുമാര്‍, സി.പി.ഒ സനല്‍ എന്നിവരാണ് അന്വേഷണ സംഘത്തിലുണ്ടായിരുന്നത്.