അഹമ്മദാബാദ്: ഇന്റര്‍ കോണ്ടിനെന്റല്‍ കപ്പില്‍ ഉത്തരകൊറിയക്ക് കിരീടം. ഇന്നലെ നടന്ന മത്സരത്തില്‍ താജികിസ്ഥാനെ എതിരില്ലാത്ത ഒരു ഗോളിന് പരാജയപ്പെടുത്തിയാണ് രണ്ടാം ഇന്റര്‍ കോണ്ടിനെന്റല്‍ കപ്പ് ഉത്തര കൊറിയ സ്വന്തമാക്കിയത്.
കളിയുടെ തുടക്കം മുതല്‍ ഇരു ടീമുകളും മികച്ച് കളിച്ചതോടെ ഇരു ഗോള്‍ മുഖത്തേക്കും കൃത്യമായി പന്തെത്തി. എന്നാല്‍ ആദ്യ പകുതിയില്‍ ആര്‍ക്കും ഗോള്‍ കണ്ടെത്താന്‍ സാധിച്ചില്ല.
മികച്ച മുന്നേറ്റങ്ങളുമായി ഇരു ടീമുകളും സുന്ദര ഫുട്‌ബോളായിരുന്നു ആദ്യ പകുതിയില്‍ പുറത്തെടുത്തത്. രണ്ടാം പകുതിയില്‍ പുതിയ ഊര്‍ജവുമായി ഇരു ടീമുകളും ഗോളിലേക്കുള്ള അക്രമം തുടര്‍ന്ന് കൊണ്ടേയിരുന്നു. എന്നാല്‍ 71-ാം മിനുട്ടില്‍ പാക് ഇല്ലിലൂടെ കൊറിയ ഗോള്‍ കണ്ടെത്തി.
ഇതോടെ താജികിസ്ഥാന്‍ പ്രതിരോധത്തിലായി. സമനില ഗോളിനായി താജികിസ്ഥാന്‍ പൊരുതി നോക്കിയെങ്കിലും രക്ഷയുണ്ടായില്ല. 85-ാം മിനുട്ടില്‍ സമനിലക്കായി താജികിസ്ഥാന് സുവര്‍ണാവസരം ലഭിച്ചെങ്കിലും ഭാഗ്യം തുണച്ചില്ല.
ഗ്രൂപ്പ് ഘട്ടത്തില്‍ നടന്ന മത്സരത്തിലും ഉത്തര കൊറിയ താജികിസ്ഥാനെ പരാജയപ്പെടുത്തിയിരുന്നു. മൂന്ന് ഗോളുമായി ഇന്ത്യന്‍ നായകന്‍ സുനില്‍ ഛേത്രി, കൊറിയന്‍ താരം ജോങ് ഗ്വാന്‍ എന്നിവര്‍ ടോപ് സ്‌കോറര്‍മാരായി. ചാംപ്യന്‍ഷിപ്പില്‍ മികച്ച പ്രകടനം ലക്ഷ്യംവച്ച് എത്തിയിരുന്നെങ്കിലും ഇന്ത്യക്ക് അവസാനസ്ഥാനം കൊണ്ട് തൃപ്തിപ്പെടേണ്ടി വന്നു. മികച്ച പ്രകടനം പുറത്തെടുത്തെങ്കിലും ഇന്ത്യയോടേറ്റ അപ്രതീക്ഷിത സമനില കാരണം സിറയയും നേരത്തെ പുറത്തായിരുന്നു.