റിയാദ്: ലോകത്തെ ഏറ്റവും വലിയ തണല്‍ക്കുട മക്കയില്‍ ഒരുങ്ങുന്നു. മക്കയിലെ മസ്ജിദുല്‍ ഹറാമിന്റെ മുറ്റത്താണ് ഇത് നിര്‍മ്മിക്കുന്നത്. തണല്‍ക്കുടയുടെ നിര്‍മ്മാണ പ്രവര്‍ത്തനങ്ങള്‍ ഉടന്‍ തന്നെ തുടങ്ങുമെന്നു ഹറം അധികൃതരെ ഉദ്ധരിച്ച് വിശദ വിവരങ്ങള്‍ പുറത്തുവിട്ട സബ്ഖ് പത്രം റിപ്പോര്‍ട്ട് ചെയ്തു.

നിലവില്‍ ലോകത്തുള്ളതില്‍ വച്ചേറ്റവും വലിയ തണല്‍ക്കുടയായിരിക്കുമിത്. ആദ്യ ഭീമന്‍ കുട ഉയരുന്നതിനു പിന്നാലെ തന്നെ ഇതിന്റെ ചെറിയ ഏഴു കുടകള്‍ കൂടി സ്ഥാപിക്കാനും പദ്ധതിയുണ്ട്. നിലവില്‍ മദീനയിലെ പ്രവാചക പള്ളിയായ മസ്ജിദുന്നബവിയിലാണ് വ്യാപകമായി ഓട്ടോമാറ്റിക് തണല്‍ക്കുടകളുള്ളത്. എന്നാല്‍ ഇത് താരതമേന്യ ചെറിയ നിരവധി കുടകളാണ്.

മക്കയിലെ മസ്ജിദുല്‍ ഹറാമില്‍ മൂന്നാം വികസന പദ്ധതിയോടനുബന്ധിച്ചാണ് ഭീമന്‍ തണല്‍ക്കുട ഒരുങ്ങുന്നത്. ഏറെകാലം മുന്‍പ് തന്നെ ഭീമന്‍ തണല്‍കുടയെ കുറിച്ചുള്ള വാര്‍ത്തകള്‍ പുറത്തു വന്നിരുന്നുവെങ്കിലും ഇപ്പോഴാണ് യാഥാര്‍ഥ്യമാകുന്നത്. മസ്ജിദുല്‍ ഹറാമിന്റെ വടക്കു പടിഞ്ഞാറ് മുറ്റത്ത് നിര്‍മ്മിക്കുന്ന കുടക്ക് 53 മീറ്റര്‍ നീളമാണുള്ളത്. അത്ര തന്നെ വീതിയുമുണ്ടാകുന്ന കുടക്കു കീഴില്‍ തണലേകി 3500 ആളുകള്‍ക്ക് നിസ്‌കരിക്കാന്‍ സൗകര്യമുണ്ടാകും. 30 മീറ്റര്‍ ഉയരമുള്ള കുടയുടെ ആകെ ഭാരം 500ടണ്‍ ആയിരിക്കും. കുടയുടെ ഭാഗങ്ങള്‍ ഘടിപ്പിക്കുന്ന ജോലികള്‍ ഉടന്‍ ആരംഭിക്കും.

[caption id="attachment_631765" align="aligncenter" width="630"] മക്കയില്‍ സ്ഥാപിക്കുന്ന കുടകളെന്ന തരത്തില്‍ സോഷ്യല്‍ മീഡിയയില്‍ പ്രചരിക്കുന്ന വ്യാജഫോട്ടോ[/caption]

 

നിരീക്ഷണ സുരക്ഷാ ക്യാമറകള്‍, അംഗസ്‌നാനത്തിനും വെള്ളം കുടിക്കാനുമുള്ള സൗകര്യങ്ങള്‍, മാര്‍ഗ്ഗ നിര്‍ദേശ ബോര്‍ഡുകള്‍, കടുത്ത ചൂടില്‍ ആശ്വാസമേകുന്ന വെള്ളം സ്‌പ്രേ ചെയുന്ന ഫാനുകള്‍, സൗണ്ട് ബോക്‌സുകള്‍ എന്നിവ ഉള്‍കൊള്ളൂന്നതാണ് ഭീമന്‍ കുട. ഭീമന്‍ കുട ഘടിപ്പിക്കുന്ന ജോലികള്‍ പൂര്‍ത്തിയായാല്‍ വടക്ക് മുറ്റത്ത് കിങ് അബ്ദുല്ല ഹറം വികസന ഭാഗത്ത് സമാന്യം വലിപ്പമുള്ള ഏഴ് കുടകള്‍ കൂടി സ്ഥാപിക്കാനും പദ്ധതിയുണ്ട്.

കവാടങ്ങള്‍ക്ക് അഭിമുഖമായിട്ടായിരിക്കും ഇവ സ്ഥാപിക്കുക. കൂടാതെ, മത്വാഫിലും തണലിടുന്ന കുട സ്ഥാപിക്കാന്‍ പദ്ധതിയുണ്ട്. ഇത് സംബന്ധിച്ച് പഠനം നടന്നുവരികയാണ്. ഗ്രാന്‍ഡ് മസ്ജിദ് വികസനം, വിവിധ പദ്ധതികളുടെ വികസനം, ഹജൂന്‍ തുരങ്കം, ബൈബാനിലെ സര്‍വ്വീസ് സ്‌റ്റേഷന്‍, കിംഗ് അബ്ദുല്‍ അസീസ് ടവറിന് പിറകിലെ കുദായി ബസ്‌സ്റ്റേഷന്‍, തുടങ്ങി ഏതാനും പദ്ധതികള്‍ കൂടി ഉടന്‍ ആരംഭിക്കും.

[caption id="attachment_631769" align="aligncenter" width="630"] മദീനയിലെ പ്രസിദ്ധമായ കുടയുടെ നിരകള്‍[/caption]

---