കോതമംഗലം: കൊച്ചി ധനുഷ്‌ക്കോടി ദേശീയപാതയിലെ സ്ഥിരം അപകടവളവില്‍ കെ.എസ്.ആര്‍.ടി.സി ബസും കാറും കൂട്ടിയിടിച്ചുണ്ടായ അപകടത്തില്‍ യുവാവിന് ഗുരുതരമായി പരുക്കേറ്റു. നെല്ലിമറ്റം കോളനിപടിക്ക് സമീപം പ്രതീക്ഷ ഭവന് മുന്നില്‍ ഇന്നലെ ഉച്ചകഴിഞ്ഞ് മൂന്ന് മണിയോടെ ആയിരുന്നു അപകടം.
മൂന്നാറില്‍ നിന്ന് എറണാകുളത്തേക്ക് പോയ കെ.എസ്.ആര്‍.ടി.സി ബസ് എതിരേ വന്ന കാറുമായി കൂട്ടിയിടിക്കുകയായിരുന്നു. അപകടത്തില്‍ ഊന്നുകല്‍ കൊല്ലറക്കല്‍ എബിന്‍ വര്‍ഗീസ് (21) നാണ് ഗുരുതരമായി പരുക്കേറ്റത്. കോതമംഗലത്ത് നിന്നും കാറില്‍ വീട്ടിലേക്ക് വരികയായിരുന്നു എബിന്‍.
ഇദ്ദേഹത്തെ ആലുവ രാജഗിരി ആശുപത്രിയില്‍ പ്രവേശിപ്പിച്ചു.എഞ്ചിനിയറിങ് പഠനം പൂര്‍ത്തിയാക്കിയ ശേഷം കോതമംഗലത്ത് സി.എക്ക് പരിശീലനം നടത്തി വരികയാണ് എബിന്‍.
സ്ഥിരം അപകടങ്ങള്‍ സംഭവിക്കുന്ന മേഖലയാണ് പ്രതീക്ഷ പടിയും സമീപത്തെ കോളനിപ്പടിയും കിഴക്ക് ഭാഗത്ത് നിന്ന് വരുന്ന വാഹനങ്ങള്‍ക്ക് പുല്ലുകുത്തിപ്പാറകയറ്റം കയറി വരുമ്പോള്‍ എതിര്‍ദിശയില്‍ നിന്ന് വരുന്ന വാഹനങ്ങള്‍ കാണാന്‍ കഴിയാതെ വരുന്നതാണ് അപകടം വരുത്തിവക്കുന്നത്.
പടിഞ്ഞാറ് ഭാഗത്തു നിന്നും വരുന്ന വാഹനങ്ങള്‍ കോളനിപ്പടിയിലെ 'റ' വളവ് തിരിഞ്ഞു വരുമ്പോഴാണ് അപകടത്തില്‍ പെടുന്നത്. ഇക്കഴിഞ്ഞ ഒരു മാസത്തിനിടെ നാലാമത്തെ അപകടമാണ് ഇന്നലത്തേത്.