ഹിദായ നഗര്‍: സമസ്ത കേരള ജംഇയ്യത്തുല്‍ ഉലമായുടെ ജനകീയനായ പണ്ഡിതനും നേതാവുമായിരുന്നു ചെറുശ്ശേരി സൈനുദ്ദീന്‍ മുസ്‌ലിയാരെന്ന് സയ്യിദ് മുനവ്വറലി ശിഹാബ് തങ്ങള്‍. പാരമ്പര്യ രീതിയോടൊപ്പം ആധുനിക സംവിധാനങ്ങളെ കൂടി ഉള്‍കൊണ്ട്, കര്‍മശാസത്ര രംഗത്തെ അതുല്യ സാന്നിധ്യമായി നിലകൊണ്ട സൈനുല്‍ ഉലമാ, പണ്ഡിതരെയും സാമുദായിക നേതാക്കളെയും ചേര്‍ത്തുനിര്‍ത്തിയ വ്യക്തിത്വമായിരുന്നുവെന്നും അദ്ദേഹം അനുസ്മരിച്ചു.

രണ്ട് പതിറ്റാണ്ടിലേറെക്കാലം സമസ്തയുടെ ജന. സെക്രട്ടറിയും ദീര്‍ഘകാലം ദാറുല്‍ഹുദായുടെ പ്രിന്‍സിപ്പലും പിന്നീട് പ്രോ. ചാന്‍സലറുമായി സേവനമനുഷ്ഠിച്ച സൈനുല്‍ ഉലമായുടെ ദേഹവിയോഗത്തിന്റെ അഞ്ചാം ആണ്ടിനോടനുബന്ധിച്ച് കാംപസില്‍ സംഘടിപ്പിച്ച അനുസ്മരണ പ്രാര്‍ഥനാ സദസ്സ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. 

ദാറുല്‍ഹുദാ ശില്‍പികളായ എം.എം ബശീര്‍ മുസ്‌ലിയാര്‍, സി.എച്ച് ഹൈദറൂസ് മുസ്‌ലിയാര്‍, ഡോ. യു. ബാപ്പുട്ടി ഹാജി, ഉമറലി ശിഹാബ് തങ്ങള്‍, ചെമ്മുക്കന്‍ കുഞ്ഞാപ്പു ഹാജി എന്നിവരുടെയും മറ്റു മണ്‍മറഞ്ഞ നേതാക്കളുടെയും അനുസ്മരണവും പ്രാര്‍ഥനാ സദസ്സും നടന്നു.

ദാറുല്‍ഹുദാ വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനായി. മാനേജ്‌മെന്റ് ജന. സെക്രട്ടറി യു. ശാഫി ഹാജി ചെമ്മാട് സ്വാഗതം പറഞ്ഞു. ഡോ. യു.വി.കെ മുഹമ്മദ്, സി.എച്ച് ത്വയ്യിബ് ഫൈസി, ഇസ്ഹാഖ് ബാഖവി ചെമ്മാട്, ശറഫുദ്ദീന്‍ ഹുദവി ആനമങ്ങാട് സംസാരിച്ചു. 

സമാപന പ്രാര്‍ഥനാ സദസ്സിന് കോഴിക്കോട് ഖാസിയും ദാറുല്‍ഹുദാ വൈ. പ്രസിഡന്റുമായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കി. കെ.എം സൈതലവി ഹാജി, ഹംസ ഹാജി മൂന്നിയൂര്‍, പി.കെ മുഹമ്മദ് ഹാജി വെളിമുക്ക്, സി.കെ മുഹമ്മദ് ഹാജി പുകയൂര്‍ തുടങ്ങിയവര്‍ സംബന്ധിച്ചു.