തളിപ്പറമ്പ്: വീട്ടില്‍ നിന്നു പുറത്തിറങ്ങവെ ഗൃഹനാഥനു കാട്ടുപന്നിയുടെ ആക്രമണത്തില്‍ പരുക്കേറ്റു. പിലാത്തറ കോട്ടക്കുന്നിലെ ഈരോത്തി കോളിച്ചാല്‍ കരുണാകരനാണ് (58) പരുക്കേറ്റത്. ഇയാളെ പരിയാരം മെഡിക്കല്‍കോളജില്‍ പ്രവേശിപ്പിച്ചു. ഇന്നലെ രാവിലെ ആറോടെയായിരുന്നു സംഭവം. പ്രഭാത കൃത്യങ്ങള്‍ക്കായി വീട്ടുവാതില്‍ തുറന്നു പുറത്തിറങ്ങിയ കരുണാകരനെ ആക്രമിച്ചശേഷം പന്നി ഓടിപ്പോവുകയായിരുന്നുവെന്നു വീട്ടുകാര്‍ പറഞ്ഞു. കൈക്കും കാലിനുമാണു പരുക്ക്. കോട്ടക്കുന്ന് ഭാഗത്ത് അടുത്തകാലത്തായി കാട്ടുപന്നികളുടെ ശല്യം വര്‍ധിച്ചിരിക്കയാണെന്നു നാട്ടുകാര്‍ പറയുന്നു.