തേസ്പൂര്‍: പതിവു പരിശീലന പറക്കലിനിടയില്‍ അപകടത്തില്‍പ്പെട്ട് തകര്‍ന്നുവീണ വ്യോമസേനയുടെ സുഖോയ്-30 യുദ്ധവിമാനത്തിന്റെ ബ്ലാക് ബോക്‌സ് കണ്ടെത്തി. അരുണാചലിലെ ഇടതൂര്‍ന്ന വനപ്രദേശത്താണ് വിമാനം തകര്‍ന്നുവീണത്. അപകടം നടന്ന് രണ്ടു ദിവസത്തിനുശേഷമാണ് ബ്ലാക് ബോക്‌സ് കണ്ടെടുത്തത്. എന്നാല്‍ ഇതിലുണ്ടായിരുന്ന രണ്ട് വൈമാനികരെ കുറിച്ച് ഇതുവരെ വിവരങ്ങളൊന്നും ലഭ്യമായിട്ടില്ലെന്ന് വ്യോമസേനാ അധികൃതര്‍ അറിയിച്ചു. സാഹസപ്പെട്ടാണ് രക്ഷാപ്രവര്‍ത്തകര്‍ വിമാനം തകര്‍ന്നുവീണ സ്ഥലത്ത് എത്തിയത്. ബ്ലാക് ബോക്‌സ് കണ്ടെടുത്തെങ്കിലും വൈമാനികരെ കണ്ടെത്തുന്നതിനുള്ള തിരച്ചില്‍ തുടരുകയാണെന്ന് വ്യോമ സേനാ വക്താവ് വിങ് കമാന്‍ഡര്‍ അനുപം ബാനര്‍ജി ഡല്‍ഹിയില്‍ അറിയിച്ചു.