തൊടുപുഴ: കൊപ്രാപ്പുരയ്ക്ക് തീപിടിച്ച് രണ്ട് ലക്ഷം രൂപയുടെ നാശനഷ്ടം.
കരിമണ്ണൂര്‍ മുളപ്പുറം കോട്ടക്കവല മാമ്മൂട്ടില്‍ ഇസ്മയില്‍ മുഹമ്മദിന്റെ കെട്ടിടത്തിലാണ് തീപടര്‍ന്നത്. ഇന്നലെ രാവിലെ 11നാണ് സംഭവം. ഉണക്കാനിട്ടിരിന്ന കൊപ്രയില്‍ തീ പടര്‍ന്ന് കെട്ടിടത്തിന്റെ മേല്‍ക്കുര പൂര്‍ണ്ണമായി കത്തി നശിച്ചു. വിവരം അറിഞ്ഞ ഉടന്‍ തന്നെ കരിമണ്ണൂര്‍ പൊലിസും നാട്ടുകാരും സ്ഥലത്തെത്തി തീയണക്കാന്‍ ശ്രമം ആരംഭിച്ചു.
തൊടുപുഴയില്‍ നിന്ന് ഫയര്‍ഫോഴ്‌സിന്റെ രണ്ട് യൂണിറ്റ് വെള്ളം എത്തിച്ചാണ് പൂര്‍ണ്ണമായി തീയണച്ചത്. സ്‌റ്റേഷന്‍ ഇന്‍ചാര്‍ജ് ടി. ഇ അലിയാര്‍, ലീഡിംഗ് ഫയര്‍മാന്‍  സാജന്‍ വര്‍ഗീസ്,ഫയര്‍മാന്‍മാരായ അനിഷ്, ഷിന്റോ, വിപിഷ്, സാജു, സുനില്‍, നാസര്‍, സുനിഷ് എന്നിവര്‍ ചേര്‍ന്നാണ് തീയണച്ചത്.
ഫയര്‍ ഫോഴ്‌സിന്റെ സമയോചിതമായ ഇടപെടലിനെത്തുടര്‍ന്ന് സമീപത്തെ വീട്ടിലേയ്ക്ക് തീ പടരാതിരുന്നത് വന്‍ ദുരന്തമൊഴിവാക്കി.