പനമരം: പനമരം - നെല്ലിയമ്പം, പനമരം-പുഞ്ചവയല്‍-ബിനാച്ചി റോഡില്‍ ദുരിതയാത്രയ്ക്ക് അറുതിയില്ല. റോഡ് തകര്‍ന്ന് യാത്ര ദുഷ്‌കരമായിട്ടും അറ്റകുറ്റപണികള്‍ നടത്തുന്നതിനോ റീടാറിങ് ചെയ്യുന്നതിനോ പൊതുമരാമത്ത് വകുപ്പ് നടപടികള്‍ സ്വീകരിക്കാത്തതില്‍ പ്രതിഷേധം വ്യാപകമാക്കാന്‍ ഒരുങ്ങുകയാണ് നാട്ടുകാര്‍.
എല്ലാ വര്‍ഷവും പേരിന് കുഴിയടക്കല്‍ നടത്തുന്നതല്ലാതെ റോഡ് പൂര്‍ണമായും ഗതാഗതയോഗ്യമാക്കുന്നതിനുള്ള ഒരു നടപടികളും ബന്ധപ്പെട്ടവകുപ്പിന്റെ ഭാഗത്ത് നിന്നുണ്ടാവുന്നില്ല. പനമരം ടൗണ്‍ മുതല്‍ നെല്ലിയമ്പം വരെ വാഹനയാത്ര സാഹസികമാണ്. നടുവൊടിക്കുന്ന യാത്രകാരണം ബസുകള്‍ക്കും പോലും അറ്റകുറ്റപണികള്‍ക്ക് വന്‍തുക വേണ്ടി വരുന്നുണ്ട്.
മാസങ്ങള്‍ക്ക് മുന്‍പ് നെല്ലിയമ്പം റോഡ് വീതി കൂട്ടി ടാറിങ് നടത്തിയിരുന്നു. നിര്‍മാണത്തിലെ അപാകത മൂലം ടാറിങ് കഴിഞ്ഞ് ആഴ്ച്ചകള്‍ക്കുള്ളില്‍ റോഡ് തകര്‍ന്നു. ഇപ്പോള്‍ ടാറിങ് കാണാന്‍ പോലുമില്ലാതെ വന്‍കുഴികള്‍ രുപപ്പെട്ടിരിക്കുകയാണ്. ദിവസേന കെ.എസ്.ആര്‍.ടി.സിയും സ്വകാര്യ ബസുകളുമടക്കം നൂറ് കണക്കിന് വാഹനങ്ങള്‍ ഈ രണ്ട്‌റൂട്ടിലുടേയും സര്‍വിസ് നടത്തുന്നുണ്ട്.
പനമരം മുതല്‍ താഴെ നെല്ലിയമ്പം വരെയും പനമരം മുതല്‍ മാത്തൂര്‍ വയല്‍ വഴി പുഞ്ചവയല്‍ വരെയും പനമരം പൊതുമരാമത്ത് സെക്ഷന്റെ കീഴിലും തുടര്‍ന്നുള്ള ഭാഗം പുല്‍പ്പള്ളി സെക്ഷന്റെ നടവയലില്‍ പ്രവര്‍ത്തിക്കുന്ന ഓഫിസിന് കീഴിലുമാണ് റോഡുള്ളത്.ഉദ്യോഗസ്ഥര്‍ തമ്മിലുള്ള ശീതസമരവും റോഡ് പണികള്‍ക്ക് തടസമാവുന്നുണ്ട്. റോഡ് യാത്ര ദുഷ്‌ക്കരമായതോടെ പൊതുമരാമത്ത് വകുപ്പ് ഓഫിസിലേക്ക് പ്രതിഷേധ സമരങ്ങള്‍ നടത്താനുള്ള തീരുമാനത്തിലാണ് നാട്ടുകാര്‍.