പരപ്പനങ്ങാടി: സൂപ്പിക്കുട്ടി നഹ മെമ്മോറിയല്‍ ഹയര്‍സെക്കന്‍ഡറി സ്‌കൂളില്‍ ദര്‍സ് വിദ്യാര്‍ഥികള്‍ക്കു പ്രവേശനം നിഷേധിച്ചതില്‍ പ്രതിഷേധിച്ചു പരപ്പനങ്ങാടി മേഖലാ എസ്.കെ.എസ്.എസ്.എഫ് കമ്മിറ്റിയുടെ ആഭിമുഖ്യത്തില്‍ നാളെ സ്‌കൂളിലേക്കു ബഹുജന പ്രതിഷേധ മാര്‍ച്ച് നടക്കും. പരപ്പനങ്ങാടി ടൗണ്‍ സ്‌കൂള്‍ പരിസരത്തുനിന്നു 9.30ന് ആരംഭിക്കും.
കഴിഞ്ഞ അധ്യയന വര്‍ഷം ദര്‍സ് വിദ്യാര്‍ഥികളടക്കമുള്ളവരുടെ യൂനിഫോം ഷര്‍ട്ടിന്റെ മുഴുക്കൈ രക്ഷിതാക്കള്‍ അറിയാതെ ഒരധ്യാപകന്‍ മുറിച്ചുമാറ്റിയിരുന്നു. അന്നു ചര്‍ച്ചയിലൂടെ വിഷയത്തില്‍ പരിഹാരമായിരുന്നെങ്കിലും ഈ അധ്യയന വര്‍ഷം തുടങ്ങുന്നതിനു മുന്‍പേ വീണ്ടും സ്‌കൂളധികൃതര്‍ വിവാദമുണ്ടാക്കുകയും പ്രവേശനത്തിനു വന്ന രണ്ട് ദര്‍സ് വിദ്യാര്‍ഥികള്‍ക്കു പ്രവേശനം നിഷേധിക്കുകയുമായിരുന്നു. ചര്‍ച്ചയില്‍ സംഘടനാ പ്രതിനിധികള്‍ ജില്ലാ വിദ്യാഭ്യാസ ഓഫിസര്‍ക്കു പരാതി നല്‍കുകയും ഡി.ഇ.ഒ വിദ്യാര്‍ഥികള്‍ക്കു പ്രവേശനം നല്‍കാന്‍ നിര്‍ദേശം നല്‍കുകയും ചെയ്തിട്ടും സ്‌കൂളധികൃതര്‍ ധിക്കാരം തുടരുകയായിരുന്നു. ജില്ലാ പ്രസിഡന്റ് സയ്യിദ് ഫഖ്‌റുദ്ദീന്‍ ഹസനി തങ്ങള്‍ ഉദ്ഘാടനം ചെയ്യുന്ന മാര്‍ച്ചിന് അഡ്വ. മുഹമ്മദ് ത്വയ്യിബ് ഹുദവി നേതൃത്വം നല്‍കും.