ആലപ്പുഴ: കുട്ടനാട്ടില്‍ വെള്ളപ്പൊക്കത്തില്‍ ദുരിതമനുഭവിച്ച മുഴുവന്‍ കുടുംബങ്ങള്‍ക്കും പൂര്‍ണ നഷ്ടപരിഹാരം നല്‍കണമെന്ന് ചമ്പക്കുളം ബ്ലോക്ക് പഞ്ചായത്ത് സമിതി ആവശ്യപ്പെട്ടു.
ആദ്യ വെള്ളപ്പൊക്കത്തില്‍ അടിയന്തരമായി പ്രഖ്യാപിച്ച 10,000 രൂപ ഇനിയും ലഭിക്കാത്തവര്‍ക്കു നല്‍കണം. പൂര്‍ണമായും ഭാഗികമായും വീട് തകര്‍ന്നവരുടെ കൃത്യമായ കണക്കുവിവരങ്ങള്‍ തയാറാക്കി അവര്‍ക്കും സഹായം വിതരണം ചെയ്യണമെന്നും സമിതി ആവശ്യപ്പെട്ടു.
അടുത്ത കൃഷിയിറക്കേണ്ട സമയമായിട്ടും കര്‍ഷകര്‍ക്കുണ്ടായ ഭീമമായ നഷ്ടത്തിനു മറുപടിയോ പരിഹാരമോ ഇല്ലെന്നും ചമ്പക്കുളം ബ്ലോക്ക് പഞ്ചായത്ത് പ്രസിഡന്റ് പോളി തോമസ് വാര്‍ത്താ സമ്മേളനത്തില്‍ കുറ്റപ്പെടുത്തി. തൊഴിലുറപ്പ് തൊഴിലാളികള്‍ക്ക് 100 ദിവസം തൊഴില്‍ദിനങ്ങള്‍ പ്രഖ്യാപിച്ചിട്ടുണ്ടെങ്കിലും മാനദണ്ഡപ്രകാരം ഏറ്റെടുക്കാന്‍ കഴിയുന്ന തൊഴിലുകളില്ല. ക്ഷീരമേഖലയിലും കാര്‍ഷിക മേഖലയിലും തൊഴിലുറപ്പ് പ്രവൃത്തികള്‍ ഏറ്റെടുക്കുന്നതിനു നടപടികള്‍ സ്വീകരിക്കണം. സര്‍ക്കാര്‍ ഗോഡൗണുകളില്‍നിന്ന് അഞ്ചുകിലോ അരിയും ഒരു ബക്കറ്റും മാത്രമാണ് കുട്ടനാട് നിവാസികള്‍ക്കു ലഭിച്ചത്. ഗോഡൗണുകളില്‍ ഇപ്പോഴും സാധനങ്ങള്‍ കെട്ടിക്കിടക്കുകയാണ്.
വൈസ് പ്രസിഡന്റ് രമണി എസ്. ഭാനുവും വാര്‍ത്താസമ്മേളനത്തില്‍ പങ്കെടുത്തു.