കണ്ണൂര്‍: ശുഹൈബ് കൊലക്കേസില്‍ സി.ബി.ഐ അന്വേഷണം ആവശ്യമില്ലെന്ന ഹൈക്കോടതി വിധിയിലൂടെ നീതി നിഷേധിക്കപ്പെട്ടെന്നു കെ. സുധാകരന്‍ എം.പി. കൊലക്കേസില്‍ സുതാര്യമായ അന്വേഷണമാണു നടന്നതെന്നു പറയുന്ന എല്‍.ഡി.എഫ് സര്‍ക്കാര്‍, ജനങ്ങളുടെ നികുതി പണമായ 50 ലക്ഷം ഫീസായി കൊടുത്ത് സി.ബി.ഐ അന്വേഷണം വരാതിരിക്കാന്‍ ഇത്ര റിസ്‌കെടുക്കുന്നത് എന്തിനാണ്.
സര്‍ക്കാര്‍ കൊണ്ടുവന്ന അസം സ്വദേശിയായ അഭിഭാഷകന്‍ ആരാണെന്ന് അന്വേഷിച്ചു കണ്ടെത്തണം. അദ്ദേഹം വന്നതിനു ശേഷമാണു കേസില്‍ മാറ്റങ്ങളുണ്ടായത്. ശുഹൈബിന കൊലപ്പെടുത്തിയ അതേ സംഘമാണു കാസര്‍കോട് പെരിയയിലെ കൃപേഷിനെയും ശരത്ത് ലാലിനെയും കൊലപ്പെടുത്തിയതെന്ന് ഉറപ്പാണ്. യഥാര്‍ഥ കൊലയാളികളെയും ഗൂഢാലോചനയില്‍ പങ്കെടുത്തവരെയും കണ്ടെത്തുന്നതിനായി കോണ്‍ഗ്രസ് ഏതറ്റം വരെയും പോകും. ഹൈക്കോടതി വിധിക്കെതിരേ സുപ്രിംകോടതിയെ സമീപിക്കാനുള്ള നടപടി ഉടന്‍ സ്വീകരിക്കുമെന്നും അദ്ദേഹം ഡല്‍ഹിയില്‍ പറഞ്ഞു.