മക്ക: വിശുദ്ധ ഹജ്ജ് കര്‍മത്തിനായി പുണ്യഭൂമിയില്‍ ഇതുവരെ എത്തിച്ചേര്‍ന്നത് പതിനാലര ലക്ഷം തീര്‍ഥാടകരാണെന്ന് സഊദി പാസ്‌പോര്‍ട്ട് വിഭാഗം അറിയിച്ചു.
വെള്ളിയാഴ്ച ഉച്ചവരെയുള്ള കണക്കുകള്‍ പ്രകാരം 14,23,230 തീര്‍ഥാടകരാണ് വ്യോമ, കപ്പല്‍, കര മാര്‍ഗങ്ങള്‍ വഴി പുണ്യഭൂമിയില്‍ എത്തിച്ചേര്‍ന്നത്.
ഇതില്‍ വിമാന മാര്‍ഗം 13,23,405 തീര്‍ഥാടകരും റോഡ് മാര്‍ഗം 82,978 തീര്‍ഥാടകരും കപ്പല്‍ മാര്‍ഗം 16,847 തീര്‍ഥാടകരുമാണ് വിദേശരാജ്യങ്ങളില്‍നിന്ന് എത്തിച്ചേര്‍ന്നത്.
ഇന്ത്യയില്‍നിന്ന് ഇന്ത്യന്‍ ഹജ്ജ് കമ്മിറ്റി, സ്വകാര്യ ഹജ്ജ് ഗ്രൂപ്പുകള്‍ വഴി 1,64,000 തീര്‍ഥാടകരും എത്തിച്ചേര്‍ന്നിട്ടുണ്ട്. ഇതില്‍ ഇന്ത്യന്‍ ഹജ്ജ് കമ്മിറ്റി മുഖേനയെത്തിയവര്‍ 1,26,262 തീര്‍ഥാടകരാണ്. നേരത്തെ മദീനയിലെത്തിയ ഹാജിമാരില്‍ ഒരാള്‍ മാത്രമാണ് ഇനി മക്കയിലേക്ക് തിരിക്കാനുള്ളത്. മുഴുവന്‍ ഇന്ത്യന്‍ ഹാജിമാരും ഇപ്പോള്‍ മക്കയിലാണ് കേന്ദ്രീകരിച്ചിരിക്കുന്നത്.