ചെറുപുഴ: ടൗണിന്റെ സുരക്ഷയ്ക്കായി പുതിയ പദ്ധതികളുമായി പൊലിസ് പദ്ധതി തയാറാക്കുന്നു. ടൗണില്‍ രാത്രികാലങ്ങളില്‍ പാര്‍ക്ക് ചെയ്യുന്ന ഓട്ടോ തൊഴിലാളികളേയും ഈ സംരംഭത്തില്‍ പങ്കാളികളാക്കും.
ടൗണിലെത്തുന്നതും ടൗണിലൂടെ കടന്നുപോകുന്നതുമായ വാഹനങ്ങളെയും യാത്രക്കാരെയും നിരീക്ഷിക്കുവാന്‍ സംവിധാനമൊരുക്കും. രാത്രിയില്‍ ടൗണില്‍ പാര്‍ക്ക് ചെയ്യുന്ന ഓട്ടോറിക്ഷ തൊഴിലാളികള്‍ക്ക് പ്രത്യേകം തിരിച്ചറിയല്‍ കാര്‍ഡുകള്‍ നല്‍കാനും തീരുമാനമായതായി ചെറുപുഴ എസ്.ഐ എം.എന്‍ ബിജോയി പറഞ്ഞു. ആവശ്യമെങ്കില്‍ ക്ലാസുകളും സംഘടിപ്പിക്കും. ഇതരസംസ്ഥാന തൊഴിലാളികളുള്‍പ്പെടെ അപരിചിതരായ നിരവധിപ്പേര്‍ അസമയങ്ങളില്‍ ചെറുപുഴയിലെത്തുന്നുണ്ട്. ടൗണിന്റെ സുരക്ഷയ്ക്ക് മുന്‍തൂക്കം നല്‍കിയാണ് പുതിയ നടപടികള്‍ക്ക് അധികൃതര്‍ ശ്രമം ആരംഭിച്ചിരിക്കുന്നത്.