പാലക്കാട്: റബര്‍ മരത്തിന്റെ ടാപ്പിങ് കാലാവധി കഴിഞ്ഞിട്ടും മരങ്ങള്‍ മുറിച്ചു മാറ്റാത്തതു് ആദിവാസികുടുംബങ്ങള്‍ക്കു ദുരിതമായിമാറി.കടുംവെട്ടു് കഴിഞ്ഞ മരങ്ങളില്‍ നിന്നും ഒരു വരുമാനവും കിട്ടാത്തതിനാല്‍ ഇവര്‍ക്ക് ജീവിക്കാന്‍ പ്രയാസമായിരിക്കുകയാണ്. മലമ്പുഴ അകമലവാരം ആനക്കല്ല് കോളനിയിലെ ആദിവാസികള്‍ക്കാണ് ഈ ദുരിതം. 1988-89 കാലഘട്ടത്തില്‍ സി.എം. സുന്ദരന്‍ തദ്ദേശ സ്വയംഭരണ വകുപ്പ് മന്ത്രിയായിരിക്കെ 15 ഏക്കര്‍ സ്ഥലം റബ്ബര്‍ തോട്ടത്തിനായി നല്‍കിയിരുന്നു. ഇവിടെ ആകെ 16 ഏക്കര്‍ 55 സെന്റ് ഭൂമിയാണുള്ളത്.
അന്ന് 15 കുടുംബങ്ങളായിരുന്നു ഇവിടെ താമസിച്ചിരുന്നത്. ഇതില്‍ തന്നെയാണ് അവര്‍ വീടുവച്ച് താമസിച്ചത്. അക്കാലത്ത് ഭൂമി നല്‍കിയെങ്കിലും കൈവശ അവകാശ പട്ടയമോ പതിച്ചു നല്‍കിയിട്ടില്ല. അന്ന് പട്ടികജാതി പട്ടിക വര്‍ഗക്കാരുടെ മുന്നേറ്റത്തിനായി വളരെയധികം പ്രവര്‍ത്തിച്ച മന്ത്രിയായിരുന്നു സി.എം. സുന്ദരം.
1995-96 കാലഘട്ടത്തിലാണ് ഇവര്‍ റബ്ബര്‍ ടാപ്പിംങ് തുടങ്ങിയത്. ഒരു ഏക്കറില്‍ 150 മരം എന്ന നിരക്കിലാണ് അന്ന് റബ്ബര്‍ മരങ്ങള്‍ വച്ചു പിടിപ്പിച്ചത്. 20-25 വര്‍ഷം വരെയാണ് റബ്ബര്‍ ടാപ്പിംങ് ചെയ്യാവുന്നത്. എന്നാല്‍ ഇവിടെയുള്ളതെല്ലാം 30 വര്‍ഷത്തിലേറെയായ മരങ്ങളാണ്. ഇതില്‍ 600 മരങ്ങളൊഴിച്ച് ബാക്കിയുളളവ കടുംവെട്ട് കഴിഞ്ഞ് മുറിച്ച് മാറ്റേണ്ടതാണ്. ഇന്നിവിടെ 45 കുടുബങ്ങള്‍ താമസിക്കുന്നുണ്ട്. ഇവരുടെ പ്രധാന വരുമാന മാര്‍ഗം റബ്ബര്‍ ടാപ്പിംങും, തൊഴിലുറപ്പ് പണിയുമൊക്കെയാണ്.
റബ്ബര്‍ ടാപ്പിങ് കഴിഞ്ഞ മരങ്ങള്‍ മുറിച്ചുമാറ്റുകയും പുതിയതായി മരങ്ങള്‍ വയ്ക്കുന്നതിനുമായി പട്ടികവര്‍ഗ വികസന വകുപ്പിന് നിവേദനം നല്‍കിയിട്ടും ഇതുവരെ ഒരു നടപടിയും ഉണ്ടായിട്ടില്ല. പുതിയ മരങ്ങള്‍ വച്ചാല്‍ മാത്രമേ ഇവര്‍ക്ക് ജോലി തുടരാനാവൂ. റബ്ബര്‍ വെട്ടാനും റബ്ബര്‍ പാല്‍ വില്‍ക്കുന്നതുമായ കാര്യങ്ങള്‍ കൈകാര്യം ചെയ്യുന്നതിനായി അവര്‍ ഏഴംഗ ഗുണഭോക്തൃ സമിതിയുണ്ടാക്കിയിട്ടുണ്ട്. റബ്ബര്‍ മരങ്ങള്‍ വയ്ക്കുന്നത് വൈകിയാല്‍ ഇവിടത്തെ പ്രദേശവാസികളുടെ ജീവിതം ദുരിതമാവും.
ആനക്കല്ലില്‍ കമ്മ്യൂണിറ്റി ഹാള്‍ നിര്‍മിക്കുന്നതിനായി ട്രൈബല്‍ ഡിപ്പാര്‍ട്ട്‌മെന്റ് 50 സെന്റ് ഭൂമിയും അതിന്റെ നിര്‍മാണ ചിലവിനായി 35 ലക്ഷം രൂപ ഫണ്ടും അനുവദിച്ചിട്ടുണ്ട്. ഇത് പഞ്ചായത്തിന് കൈമാറിയിട്ടുണ്ടെന്നാണ് മുന്‍ വാര്‍ഡ് മെമ്പര്‍ വി.വിദ്യാധരന്‍ പറയുന്നത്. പക്ഷേ പഞ്ചായത്തില്‍ നിന്നും ഇതുവരെ നിര്‍മ്മാണ പ്രവര്‍ത്തനങ്ങളൊന്നും തുടങ്ങിയിട്ടില്ല. ആരും ശ്രദ്ധിക്കാത്ത മേഖലയാണ് അകമലവാരം. ആനക്കല്ല് മേഖലയില്‍ ആദിവാസികളാണ് കൂടുതലും താമസിക്കുന്നത്. റബ്ബര്‍ മരങ്ങള്‍ മുറിച്ചിമാററി പുതിയ തൈകള്‍ നടാനും, കമ്മ്യൂണിറ്റി ഹാളിന്റെ നിര്‍മാണത്തിലും ഉടന്‍ നടപടി സ്വീകരിണമെന്ന് കോളനിവാസികള്‍ പറയുന്നു.