തിരുവനന്തപുരം: ക്രൈസ്തവ മതമേലധ്യക്ഷന്‍മാരുമായി ബി.ജെ.പി ദേശീയ പ്രസിഡന്റ് അമിത് ഷാ കൂടിക്കാഴ്ച നടത്തി. മലങ്കര സഭയുടെ ആസ്ഥാനമായ തിരുസന്നിധിയില്‍ എത്തിയാണ് മലങ്കര കത്തോലിക്ക കര്‍ദിനാള്‍ ബസേലിയോസ് മാര്‍ ക്ലിമീസ് കാതോലിക്ക ബാവ, ലത്തീന്‍ അതിരൂപത ആര്‍ച്ച് ബിഷപ്പ് ഡോ. എം. സൂസെപാക്യം എന്നിവരുമായി കൂടിക്കാഴ്ച നടത്തിയത്.
മാര്‍ ക്ലിമീസ് കാതോലിക്ക ബാവയാണ് ചര്‍ച്ചയ്ക്കു നേതൃത്വം നല്‍കിയത്. ചര്‍ച്ചയില്‍ രാഷ്ട്രീയം വിഷയമായിട്ടില്ലെന്ന് മതനേതാക്കള്‍ മാധ്യമങ്ങളോടു പറഞ്ഞു. കന്നുകാലി അറവ് വിഷയവും ചര്‍ച്ചയായില്ല. ന്യൂനപക്ഷ മതവിഭാഗങ്ങളുടെ സുരക്ഷ ഉറപ്പാക്കണമെന്ന് ആവശ്യപ്പെട്ടിട്ടുണ്ട്. യെമനില്‍ തടവിലാക്കപ്പെട്ട ഫാ. ടോം ഉഴുന്നാലിലിന്റെ മോചനത്തിനായുള്ള ശ്രമം കേന്ദ്രം ഊര്‍ജിതമാക്കണമെന്ന് ആവശ്യപ്പെട്ടതായും അവര്‍ പറഞ്ഞു.