നെയ്യാറ്റിന്‍കര: അമരവിള എക്‌സൈസ് ചെക്‌പോസ്റ്റില്‍ ലൈസന്‍സില്ലാത്ത നിറ തോക്കുമായി യുവാവ് പിടിയില്‍. തിരുനെല്‍വേലി മാവട്ടത്ത് ശങ്കരന്‍നഗര്‍ സി.എസ്.ഐ പളളിയ്ക്ക് സമീപം താമസിക്കുന്ന പ്രദീപ് (25 ) ആണ് പിടിയിലായത്. ഇന്നലെ രാവിലെ നടന്ന വാഹന പരിശോധനയ്ക്കിടെയാണ് ഇയാള്‍  പിടിയിലായത്.
തമിഴ്‌നാട്ടില്‍ നിന്നും വന്ന ട്രാന്‍സ്‌പോര്‍ട്ട് ബസിലായിരുന്നു ഇയാള്‍ വന്നത്. തോക്ക് ബാഗില്‍ ഒളിപ്പിച്ച നിലയിലായിരുന്നു. കൂടാതെ വെടിയുണ്ടകളും പിടിച്ചെടുത്തു.
വര്‍ഗീയ സംഘര്‍ഷത്തെ തുടര്‍ന്ന് തിരുനെല്‍വേലിയില്‍ പൊലിസ് പരിശോധന ശക്തമാക്കിയതിനാലാണ്  ഇയാള്‍  കേരളത്തിലേക്ക് കടന്നതെന്നാണ് പ്രാഥമിക നിഗമനം. ഇയാള്‍ക്കു പുറമേ നാലംഗ സംഘം  കാറില്‍ കേരളത്തിലേക്ക് കടന്നതായും വിവരമുണ്ട്. പിടിയിലായ പ്രദീപ് രണ്ട് കൊലക്കേസുകളിലെ പ്രതിയാണെന്ന്  എക്‌സൈസ് അധികൃതര്‍ പറഞ്ഞു.ഇയാളെ നെയ്യാറ്റിന്‍കര പൊസീസിനു കൈമാറി. സംഭവം അറിഞ്ഞ് എക്‌സൈസ് കമ്മിഷ്ണര്‍ ഋഷിരാജ് സിങ് അമരവിളയില്‍ എത്തിയിരുന്നു.
എക്‌സൈസ് ഇന്‍സ്‌പെക്ടര്‍ അന്‍വറിന്റെ നേതൃത്വത്തില്‍ ജീവനക്കാരായ ബിജു , അനില്‍കുമാര്‍ , സെല്‍വം , പീതാംബരന്‍ എന്നിവരടങ്ങിയ സംഘമാണ് യുവാവിനെ പിടികൂടിയത്.